മണ്ണിടിച്ചില്‍ : ഹിമാചല്‍ പ്രദേശില്‍ മരിച്ചവരുടെ എണ്ണം 50 കവിഞ്ഞു

മാണ്ഡിയില്‍ മണ്ണിടിഞ്ഞുണ്ടായ അപകടത്തില്‍ മരിച്ചവരുടെ എണ്ണം 50 കഴിഞ്ഞു. ഞായറാഴ്ച പുലര്‍ച്ചെ മാണ്ഡി-പത്താന്‍കോട്ട് ദേശീയ പാതയിലാണ് വന്‍ മണ്ണിടിച്ചിലുണ്ടായത്. 45 പേരുടെ മൃതദേഹങ്ങള്‍ കണ്ടത്തിയതായാണ് റിപ്പോര്‍ട്ട്‌. അപകടത്തില്‍ നിരവധി പേരെ കാണാതായി. പരിക്കേറ്റ അഞ്ച് പേരെ മാണ്ഡിയിലെ സോണല്‍ ആശുപത്രിയില്‍ പ്രവേശിപ്പിച്ചു.

അപകടത്തില്‍ നിരവധി സ്വകാര്യ വാഹനങ്ങളും നിരവധി വീടുകളും തകര്‍ന്നിട്ടുണ്ട്. അതിന് പുറമെ 55 യാത്രക്കാരുമായി പോയ ഹിമാചല്‍ റോഡ്‌വേസ് ട്രാന്‍സ്‌പോര്‍ട്ട് കോര്‍പ്പറേഷന്‍ ബസ്സും അപകടത്തില്‍ പെട്ടിട്ടുണ്ടെന്നാണ് റിപ്പോര്‍ട്ടുകള്‍. കനത്ത മഴയിലും മണ്ണിടിച്ചിലിലും തുടരുന്നതിനിടെ ഇരുവശങ്ങളിലേക്കുമായി യാത്ര ചെയ്തുകൊണ്ടിരിക്കുന്ന രണ്ട് ബസ്സുകളാണ് അപകടത്തില്‍ പെട്ടിരിക്കുന്നത്. അതിനാല്‍ തന്നെ മരണനിരക്ക് വീണ്ടും ഉയരുമെന്നാണ് സൂചന. അപകടസ്ഥലത്ത് മുഖ്യമന്ത്രി വീരഭദ്ര സിംഗ് സന്ദര്‍ശിച്ചു. മരിച്ചവരുടെ കുടുംബത്തിന് അഞ്ച് ലക്ഷം രൂപ ധനസഹായവും വാഗ്ദാനവും ചെയ്തിട്ടുണ്ട്.