കേന്ദ്ര മന്ത്രിസഭയില്‍ വന്‍ അഴിച്ചു പണി;വമ്പന്‍മാര്‍ പുറത്ത്‌

ന്യൂഡൽഹി: നരേന്ദ്ര മോദി സർക്കാർ അധികാരത്തിലെത്തിയ ശേഷമുള്ള ഏറ്റവും വലിയ മന്ത്രിസഭാ അഴിച്ചുപണി ഇന്ന്. രാഷ്‌ട്രപതിഭവനിൽ രാവിലെ 10.30-നാണ് പുതിയ മന്ത്രിമാരുടെ സത്യപ്രതിജ്ഞ. 2019ലെ ലോക്സഭാ തെരഞ്ഞെടുപ്പിനു മുന്നോടിയായുള്ള കേന്ദ്രമന്ത്രിസഭയിലെയും ബിജെപിയിലെയും ടീം മോദിയുടെ പുനഃസംഘടനയിൽ ആർഎസ്എസിന്റെട വർധിച്ച സ്വാധീനം വ്യക്തമാകും.

പുതിയ പത്തു പേരെങ്കിലും ഇന്നു മന്ത്രിമാരായി സത്യപ്രതിജ്ഞ ചെയ്യുമെന്നറിയുന്നു. അമിത് ഷാ നേരിട്ട് നിർദേശിച്ചതിനെ ത്തുടർന്ന് രാജീവ് പ്രതാപ് റൂഡി, കൽരാജ് മിശ്ര, ബന്ദാരു ദത്താത്രേയ, ഗിരിരാജ് സിംഗ്, സഞ്ജയ് ബല്യാൻ, ഭഗത്‌സിംഗ് കുലസ്തെ, മഹേന്ദ്രനാഥ് പാണ്ഡെ എന്നിവർ നേരത്തേതന്നെ മന്ത്രിസ്ഥാനം രാജിവച്ചിട്ടുണ്ട്. ഏതാനും പേർ കൂടി ഇനിയും രാജിവയ്ക്കുമെന്ന് ബിജെപി കേന്ദ്രങ്ങൾ അറിയിച്ചു. ഉമാ ഭാരതിയെ ഒഴിവാക്കുന്നതിൽ ആർഎസ്എസിന് നേരിയ അതൃപ്തിയുണ്ട്.

പ്രധാനമന്ത്രി മോദിയും ബിജെപി അധ്യക്ഷൻ അമിത് ഷായും തമ്മിൽ ഇന്നലെ രാത്രി ഏഴു മണിയോടെ മന്ത്രിസഭാ വികസനം സംബന്ധിച്ച് നടത്തിയ അവസാനവട്ട ചർച്ചയിലും ചില പേരുകളുടെയും വകുപ്പുകളുടെയും കാര്യത്തിൽ തീരുമാനമായില്ല. കേന്ദ്രമന്ത്രിയും ആർഎസ്എസിന്റെയ വിശ്വസ്തനുമായ നിതിൻ ഗഡ്കരി രാത്രി ഏഴരയോടെ ലോക് കല്യാണ്‍ മാർഗിലെ പ്രധാനമന്ത്രിയുടെ ഒൗദ്യോഗിക വസതിയിൽ ചർച്ചയ്ക്കെത്തി. യുപിയിലെ വൃന്ദാവനിൽ ആർഎസ്എസ് നേതാക്കളുടെ യോഗത്തിൽ പങ്കെടുത്ത ശേഷമാണ് മോദിയുമായി ചർച്ചയ്ക്ക് അമിത് ഷാ ഇന്നലെ വൈകുന്നേരം ഡൽഹിയിലെത്തിയത്.