ലാലു പ്രസാദ് യാദവിന്റെ സ്വത്തുക്കള്‍ കണ്ടുകെട്ടി

ബീഹാര്‍ മുന്‍മുഖ്യമന്ത്രിയും ആര്‍ജെഡി നേതാവുമായ ലാലു പ്രസാദ് യാദവിന്റെ സ്വത്തുക്കള്‍ കണ്ടുകെട്ടി. ഡല്‍ഹിയിലും ബീഹാറിലുമായുള്ള 165 കോടി രൂപയുടെ സ്വത്തുക്കളാണ് കണ്ടുകെട്ടിയിട്ടുള്ളത്. ലാലുവിന്റെ മകന്‍ തേജസ്വി യാദവിന്റെ ബീഹാറിലും ന്യൂഡല്‍ഹിയില്‍ നിന്നുമുള്ള പ്ലോട്ടുകളും മിര്‍സാ ഭാരതിയുടെ ഫാംഹൗസ് എന്നിവയും പിടിച്ചെടുത്തവയില്‍ ഉള്‍പ്പെടുന്നുണ്ട്.

നേരത്തെ തേജസ്വിയുടെ പേരില്‍ ഉയര്‍ന്ന അഴിമതി ആരോപണത്തിന് പിന്നാലെ ജെഡിയു നേതാവും മുഖ്യമന്ത്രിയുമായിരുന്ന നിതീഷ് കുമാര്‍ മഹാസഖ്യം പൊളിച്ച് പുറത്ത് വന്നിരുന്നു. പിന്നീട് എന്‍ഡിഎയുമായി സഖ്യത്തിലായി മുഖ്യമന്ത്രി സ്ഥാനത്ത് എത്തുകയും ചെയ്തിരുന്നു. യാദവ് കുടുംബത്തിലെ അഞ്ചു പേര്‍ക്കെതിരെയാണ് നികുതി വെട്ടിപ്പും അനധീകൃത ഭൂമിയിടപാടുകളും അടക്കമുള്ള അഴിമതി ആരോപണം ഉയര്‍ന്നുവന്നിരിക്കുന്നത്. നിരവധി കേസുകളും ഇവര്‍ക്കെതിരെ രജിസ്റ്റര്‍ ചെയ്തിട്ടുണ്ട്.