നടി ആക്രമിക്കപ്പെട്ട ദിവസം ആശുപത്രിയിലായിരുന്നെന്ന് വ്യാജരേഖ : ദിലീപിനെതിരേ പുതിയ കേസ്

നടി ആക്രമിക്കപ്പെട്ട ദിവസം താന്‍ അസുഖ ബാധിതനായി ആശുപത്രിയായിരുന്നെന്ന് ദിലീപ് വ്യാജരേഖ ചമച്ചതായി പോലീസ് റിപ്പോര്‍ട്ട്. ആശുപത്രിയില്‍ അന്വേഷണം നടത്തിയ പോലീസ് സംഘം വ്യാജരേഖ ചമച്ചതായി കണ്ടെത്തിയതായും റിപ്പോര്‍ട്ടില്‍ പറയുന്നു. നടി ആക്രമിക്കപ്പെട്ട സംഭവം നടന്ന ദിവസമായ ഫെബ്രുവരി 17 മുതല്‍ 21 വരെ താന്‍ അസുഖം ബാധിച്ച് ആലുവയിലെ ഒരു സ്വകാര്യ ആശുപത്രിയില്‍ ആയിരുന്നെന്നാണ് ദീലീപ് പോലീസിന് നല്‍കിയ മൊഴി.

ദിലീപിനെ പരിചരിച്ച നഴ്സ് അവധിയിലായ ദിവസവും വ്യാജപരിശോധനാ കുറിപ്പെഴുതി. ഷുഗര്‍ പരിശോധിച്ചെന്നും പനി പരിശോധിച്ചെന്നും രേഖപ്പെടുത്തി. ദിലീപിന്റെ അസുഖവിവരം സംബന്ധിച്ച റിപ്പോര്‍ട്ട് എഴുതിയ നഴ്‌സ് ദിലീപ് ആശുപത്രിയില്‍ ഉണ്ടായിരുന്നു എന്ന് പറയപ്പെടുന്ന ദിവസം അവധിയിലായിരുന്നു എന്നും ഡോക്ടറുടെ നിര്‍ദേശപ്രകാരമാണ് ഇങ്ങിനെ ചെയ്തതെന്നും അന്വേഷണ സംഘത്തിന് മൊഴി നല്‍കിയതായിട്ടാണ് റിപ്പോര്‍ട്ട്. നഴ്സിനെ ചോദ്യം ചെയ്തപ്പോഴാണ് നിർണായക വെളിപ്പെടുത്തലുകൾ പുറത്തുവന്നത്. ഇവരുടെ മൊഴി മജിസ്‌ട്രേറ്റിന് മുന്നില്‍ രേഖപ്പെടുത്തുകയും ചെയ്തിട്ടുണ്ട്. പോലീസ് ദിലീപിനെ വീണ്ടും അറസ്റ്റ് ചെയ്‌തേക്കുമെന്നും ജാമ്യം റദ്ദാക്കാന്‍ ആവശ്യപ്പെട്ടേക്കുമെന്നും സൂചന.