ഉദയഭാനുവിനെ കുരുക്കി ഡ്രൈവറുടെ മൊഴി; യാത്രയിലുടനീളം നിരന്തരം കോള്‍..!

രാജീവ് കൊല്ലപ്പെട്ട കേസില്‍ അഭിഭാഷകന്‍ ഉദയഭാനുവിനെ കുരുക്കി കാര്‍ഡ്രൈവറുടെ മൊഴി. അന്നേദിവസം ഉദയഭാനു ചാലക്കുടിയിലേക്ക് ഓട്ടം വിളിച്ചതായും യാത്രയ്ക്കിടെ ഉദയഭാനുവിന് നിരന്തരം കോള്‍ വന്നതായും കാര്‍ ഡ്രൈവറുടെ വെളിപ്പെടുത്തല്‍. കോള്‍ ആരുടേതായിരുന്നു എന്ന വിവരം ഇയാള്‍ നല്‍കിയിട്ടുണ്ടോ എന്ന് വ്യക്തമല്ല.

കൊച്ചിയില്‍ നിന്നുമാണ് ചാലക്കുടിയിലേക്ക് പോകാന്‍ ഉദയഭാനു കാര്‍ വിളിച്ചത്. യാത്രയ്ക്കിടയില്‍ അനേകം കോളുകള്‍ ഉദയഭാനുവിന് എത്തി. ആലുവയില്‍ എത്തിയപ്പോള്‍ രാജീവിന് അപകടം പിണഞ്ഞെന്ന് ഫോണ്‍ വന്നതായും പിന്നാലെ കാര്‍ തിരിച്ചുവിടാന്‍ ഡ്രൈവറോട് ഉദയഭാനു ആവശ്യപ്പെടുകയും ചെയ്തു. തിരുവനന്തപുരത്തേക്ക് കാര്‍ വിടാനായിരുന്നു ആവശ്യപ്പെട്ടത്. പോകുന്നതിനിടയില്‍ ജോണിയോടും രഞ്ജിത്തിനോടും തിരുവനന്തപുരത്തേക്ക് വരാന്‍ ആവശ്യപ്പെടുകയും ആലപ്പുഴയില്‍ എത്തിയപ്പോള്‍ മൊബൈല്‍ഫോണ്‍ ഓഫാക്കുകയും ചെയ്തു. ഡ്രൈവറുടെ മൊഴി കേസില്‍ ഏറെ നിര്‍ണ്ണായകമായി മാറിയേക്കും.