കേന്ദ്ര സര്‍ക്കാരിന്റെ കണക്ക് കൂട്ടലുകള്‍ തെറ്റിച്ച്‌ കള്ളപ്പണത്തിന്റെയും നികുതിവെട്ടിപ്പിന്റെയും കണക്കുകള്‍ പുറത്ത് !

കേന്ദ്ര സര്‍ക്കാരിന്റെ ഒന്നാം വാര്‍ഷികം കള്ളപ്പണ വിരുദ്ധദിനമായി ആചരിക്കുവാന്‍ മണിക്കൂറുകള്‍ മാത്രം ശേഷിക്കെ നികുതി വെട്ടിപ്പിന്റെയും വിദേശ നിക്ഷേപത്തിന്റെയും കണക്കുകള്‍ പുറത്ത്. വിദേശത്തുള്ള 19 നികുതി രഹിത രാജ്യങ്ങളിലായി നിക്ഷേപിച്ചിരിക്കുന്ന പണത്തിന്റെ കണക്കാണ് പുറത്ത് വന്നിരിക്കുന്നത്. പാരഡൈസ് പേപ്പഴ്‌സ് എന്ന് പേരിട്ടിട്ടുള്ള ഈ കണ്ടെത്തലില്‍ 13.4 മില്യണ്‍ രേഖകളാണുള്ളതെന്നാണ് റിപ്പോര്‍ട്ടുള്ളത്.

ഇന്ത്യയുള്‍പ്പടെയുള്ള രാജ്യങ്ങളില്‍ നിന്നുമാണ് പണം വിദേശങ്ങളിലേയ്ക്ക് കൊണ്ടുപോയത്. ബോളീവുഡ് താരം അമിതാഭ് ബച്ചനും കേന്ദ്ര സഹമന്ത്രി ജയന്ത് സിന്‍ഹ എന്നിവരുള്‍പ്പടെയുള്ളവരുടെ പേരു വിവരങ്ങള്‍ ഇതിലുണ്ട്.ജര്‍മ്മന്‍ ദിനപത്രമായ ന്യൂദ് ഡോയ്‌ച്ചേ സയറ്റങ്ങും അന്വേഷാത്മക പത്രപ്രവര്‍ത്തനത്തിന്റെ കൂട്ടായ്മയായ ഇന്റര്‍നാഷണല്‍ കണ്‍സോര്‍ഷ്യം ഓഫ് ഇന്‍വെസ്റ്റിഗേറ്റീവ് ജോണലിസ്റ്റും 96 മാധ്യമ സ്ഥാപനങ്ങളുമായി ചേര്‍ന്ന് നടത്തിയ സംയുക്ത അന്വേഷണത്തിലാണ് വിവരങ്ങള്‍ പുറത്തായത്. ഇവര്‍ തന്നെയാണ് പനാമ പേപ്പേഴ്‌സും പുറത്തുവിട്ടിരിക്കുന്നത്.

180 രാജ്യങ്ങളില്‍ നിന്നുള്ള വിവരങ്ങളാണ് ഇപ്പോള്‍ പുറത്തുവിട്ടിരിക്കുന്നത്. ഇതില്‍ 714 ഇന്ത്യക്കാരുടെ പേരും ഉള്‍പ്പെട്ടിരിക്കുന്നു. ബര്‍മുഡയിലെ ആപ്പിള്‍ബൈ നിയമസ്ഥാപനത്തില്‍ നിന്നുള്ള വിവരങ്ങളാണ് പുറത്തായിരിക്കുന്നത്.