2ജി കുംഭകോണം: മൂന്നു കേസിലെ വിധികളുടെ തിയതി ഇന്നറിയാം

2ജി കുംഭകോണവുമായി ബന്ധപ്പെട്ട് മൂന്നു കേസുകളിലെ വിധി എന്നു പറയുമെന്ന് പ്രത്യേക വിചാരണ കോടതി ഇന്ന് വ്യക്തമാക്കും. മുന്‍ ടെലികോം മന്ത്രി എ.രാജ, ഡി.എം.കെ എം.പി കനിമൊഴി തുടങ്ങി ഉന്നത രാഷ്ട്രീയ നേതൃത്വങ്ങളും വ്യവസായ പ്രമുഖരുമാണ് 2ജിയില്‍ കുടുങ്ങിയിരിക്കുന്നത്.

മൂന്നു കേസുകളില്‍ രണ്ടെണ്ണം സി.ബി.ഐ അന്വേഷിച്ചവയും ഒരെണ്ണം എന്‍ഫോഴ്‌സ്‌മെന്റ് ഡയറക്ടറേറ്റ് സമര്‍പ്പിച്ചതുമാണ്. 2 ജി സ്‌പെക്ട്രത്തിന്റെ 122 ലൈസന്‍സുകള്‍ അനുവദിച്ചതുവഴി ഖജനാവിന് 30,984 കോടി രൂപയുടെ നഷ്ടം സംഭവിച്ചുവെന്നാണ് സി.ബി.ഐയുടെ കണ്ടെത്തല്‍. എ.രാജയ്ക്കും മറ്റു പ്രതികള്‍ക്കുമെതിരെ 2011 ഏപ്രിലില്‍ ആണ് സി.ബി.ഐ കുറ്റപത്രം സമര്‍പ്പിച്ചത്. ഈ സ്‌പെക്ട്രം ഇടപാട് 2012 ഫെബ്രുവരി രണ്ടിന് സുപ്രീം കോടതി റദ്ദാക്കുകയും ചെയ്തിരുന്നു.