സുശീല്‍കുമാര്‍ മോദിയെ വീട്ടില്‍ കയറി തല്ലുമെന്ന് തേജ് പ്രതാപ് യാദവ്‌

സുശീല്‍കുമാര്‍ മോദിയെ വീട്ടില്‍ കയറി തല്ലുമെന്ന് ബീഹാര്‍ മുന്‍മുഖ്യമന്ത്രി റാബറി ദേവി യുടെ മകനും മുന്‍ ആരോഗ്യ മന്ത്രിയുമായ തേജ് പ്രതാപ് യാദവ്‌. ഉപമുഖ്യമന്ത്രിയും ബിജെപി നേതാവുമായി സുശീല്‍ കുമാര്‍ മോദിയെ വീട്ടില്‍ കയറിതല്ലുമെന്നാണ് പൊതുസമ്മേളനത്തില്‍ വച്ച് തേജ് പ്രതാപിന്റെ ഭീഷണി.

സുശീല്‍ കുമാര്‍ മോദിയുടെ മകന്റെ വിവാഹവുമായി ബന്ധപ്പെടുത്തിയായിരുന്നു ലാലുവിന്റെ മകന്റെ പ്രസ്താവന. വിവാഹത്തിനു പോകുമോ എന്നു ചോദിച്ചപ്പോള്‍, വിവാഹത്തിനു പോയാല്‍ സുശീല്‍ കുമാര്‍ മോദിയെ അടിക്കേണ്ടി വരുമെന്നാണായിരുന്നു തേജ് പ്രതാപിന്റെ മറുപടി. ആര്‍.ജെ.ഡി നടത്തുന്ന യുദ്ധം അവസാനിപ്പിച്ചിട്ടില്ല. അത് തുടരുകയാണ്. അതിനെതിരായ നിലപാട് സ്വീകരിച്ചാല്‍ മോദിയുടെ വസതിയില്‍ കയറി അദ്ദേഹത്തെ മര്‍ദ്ദിക്കാന്‍ മടിക്കില്ല. ഔറംഗാബാദില്‍ നടന്ന ഒരു പൊതുസമ്മേളനത്തിലാണ് തേജ് പ്രതാപ് ഭീഷണി മുഴക്കിയത്. എന്നാല്‍, നിരാശയുടെ ഫലമായിട്ടാണ് തേജ് പ്രതാപ് ഇത്തരത്തിലുള്ള ഭീഷണി മുഴക്കിയതെന്നാണ് ഇതുസംബന്ധിച്ച ചോദ്യത്തോട് സുശീല്‍കുമാര്‍ മോദി പ്രതികരിച്ചത്.