ഹാദിയായെ കോടതിയിലേക്ക് കൊണ്ടുപോയത് കനത്ത സുരക്ഷയില്‍ ; ഹാദിയയ്ക്ക് പറയാനുള്ളത് കോടതി കേള്‍ക്കും !

ഹാദിയായെ കോടതിയിലേക്ക് കൊണ്ടുപോയത് കനത്ത സുരക്ഷയില്‍. ഉച്ചകഴിഞ്ഞ് 2.15 ഓടെ മാതാപിതാക്കള്‍ക്കൊപ്പം ഹാദിയ കനത്ത പോലീസ് സംരക്ഷണത്തിലാണ് ഹാദിയയെ കൊണ്ടുപോയത്. ശനിയാഴ്ച രാത്രി ഹാദിയയെ കേരള ഹൗസില്‍ കൊണ്ടുവന്നതു മുതല്‍ കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്. പിന്‍വശത്തെ ഗേറ്റ് വഴിയാണ് കേരള ഹൗസില്‍ എത്തിയത്. കേരള ഹൗസിലേക്ക് പുറമേ നിന്നുള്ളവര്‍ക്ക് പ്രവേശനം നിഷേധിച്ചു. പൊതു കാന്റീനിലു പൊതുജനങ്ങള്‍ക്ക് പ്രവേശനം അനുവദിച്ചിരുന്നില്ല.

കേരള, ഡല്‍ഹി പോലീസിനു പുറമേ കമാന്‍ഡോ സുരക്ഷയും രാജസ്ഥാന്‍ ആംഡ് ഫോഴ്‌സും ഹാദിയയ്ക്ക് ഏര്‍പ്പെടുത്തി. ബുള്ളറ്റ്പ്രൂഫ് വാഹനത്തിലാണ് കോടതിയില്‍ എത്തിച്ചത്. മാധ്യമങ്ങളുടെ കാമറയില്‍ നിന്ന് മറച്ചാണ് കേരള ഹൗസില്‍ നിന്ന് പുറത്തേക്ക് പോയത്. മുന്‍വശത്തുള്ള ഗേറ്റ് വഴിയാണ് വാഹനവ്യുഹം പുറപ്പെട്ടത്. ഡല്‍ഹി പോലീസിന്റെ ആറ് കാറുകളും കേരള ഹൗസില്‍ നിന്നുള്ള വാഹനങ്ങളും വ്യൂഹത്തിയുണ്ടായിരുന്നു.

മൂന്നു മണിക്ക് കേസ് പരിഗണിക്കുമ്പോള്‍ ഹാദിയയ്ക്ക് പറയാനുള്ളത് കോടതി കേള്‍ക്കും. അടച്ചിട്ട മുറിയില്‍ വാദം വേണമെന്ന പിതാവ് അശോകന്റെ ആവശ്യത്തിലും തീര്‍പ്പുണ്ടാകും. എന്‍.ഐ.എയും ഈ ആവശ്യത്തെ പിന്തുണയ്ക്കും. എന്‍.ഐ.എയുടെ അന്വേഷണത്തിനെതിരെ ഷെഫിന്‍ ജഹാന്‍ സമര്‍പ്പിച്ച ഹര്‍ജിയും പരിഗണിക്കും.