മോദി കീഴാളനും അപരിഷ്‌കൃതനുമാണെന്ന് പറഞ്ഞ മണി ശങ്കര്‍ അയ്യര്‍ക്കെതിരെ രാഹുല്‍ ഗാന്ധി

പ്രധാനമന്ത്രി നരേന്ദ്ര മോദി കീഴാളനും അപരിഷ്‌കൃതനുമാണെന്ന് പറഞ്ഞ മണി ശങ്കര്‍ അയ്യര്‍ക്കെതിരെ രാഹുല്‍ ഗാന്ധി. പ്രധാനമന്ത്രിക്കെതിരെ അപകീര്‍ത്തികരമായ പരാമര്‍ശം നടത്തിയ മണിശങ്കര്‍ അയ്യര്‍ മാപ്പ് പറയണമെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ആവശ്യപ്പെട്ടു. മണി ശങ്കര്‍ അയ്യരുടെ ഭാഷയോ ശൈലിയോ അംഗീകരിക്കുന്നില്ല. അദ്ദേഹം മാപ്പ് പറയുമെന്നാണ് താനും കോണ്‍ഗ്രസ് പാര്‍ട്ടിയും പ്രതീക്ഷിക്കുന്നത്-രാഹുല്‍ ട്വീറ്റ് ചെയ്തു.

ബി.ജെ.പി നേതാക്കളും പ്രധാനമന്ത്രിയും കോണ്‍ഗ്രസ് നേതാക്കള്‍ക്കെതിരെ അപകീര്‍ത്തികരമായ പദപ്രയോഗങ്ങളാണ് നിരന്തരം നടത്തുന്നത്. ബി.ജെ.പിയുടെ ഇത്തരം ശൈലിയല്ല കോണ്‍ഗ്രസിനുള്ളതെന്നും രാഹുല്‍ കൂട്ടിച്ചേര്‍ത്തു. മണി ശങ്കര്‍ അയ്യരുടെ കീഴാള പ്രയോഗം കോണ്‍ഗ്രസ് പാര്‍ട്ടിയുടെ മുഗള്‍ മനോഭാവമാണ് കാണിക്കുന്നതെന്ന് പ്രധാനമന്ത്രി പ്രതികരിച്ചിരുന്നു. ഇതിന് പിന്നാലെയാണ് അയ്യര്‍ മാപ്പ് പറയണമെന്ന് രാഹുല്‍ നിര്‍ദ്ദേശിച്ചത്.