ജനങ്ങളെ ഭയം മോദി യുദ്ധം വോട്ടാക്കുന്നു : സച്ചിന്‍ പൈലറ്റ്

  രാജ്യത്തെ ബാധിക്കുന്ന മറ്റ് വിഷയങ്ങളൊന്നും ചര്‍ച്ചയായി വരാതിരിക്കാന്‍ സൈനികരുടെ ധൈര്യത്തെ പ്രധാനനമന്ത്രി നരേന്ദ്ര മോദി മറയാക്കുകയാണെന്ന് രാജസ്ഥാന്‍ ഉപമുഖ്യമന്ത്രി സച്ചിന്‍ പൈലറ്റ് പറഞ്ഞു. യുദ്ധം വോട്ടാക്കിമാറ്റുന്ന ബാലിശമായ നീക്കമാണ് പ്രധാനമന്ത്രിയും പാര്‍ട്ടിയും നടത്തുന്നത്. തിരഞ്ഞെടുപ്പിലെ യഥാര്‍ത്ഥ വിഷയങ്ങളെ അട്ടിമറിക്കുകയാണ്, ആള്‍ ഇന്ത്യ പ്രൊഫഷണല്‍സ് കോണ്‍ഗ്രസിന്റെ ആഭിമുഖ്യത്തില്‍ നടന്ന സംവാദത്തില്‍ സംസാരിക്കുകയായിരുന്നു അദ്ദേഹം. ജനങ്ങളുടെ അടിസ്ഥാന പ്രശ്നങ്ങളെ അഭിമുഖീകരിക്കാത്ത പ്രധാനമന്ത്രിക്കും അമിത് ഷായ്ക്കും ജനങ്ങള്‍ തിരഞ്ഞെടുപ്പിലൂടെ മറുപടി നല്‍കും. നോട്ടു നിരോധനം രാജ്യത്തെ ദുരിതത്തിലാക്കി. സാമ്പത്തിക വളര്‍ച്ച പിന്നോട്ടാണ്. നിക്ഷേപ സാഹചര്യമില്ല. തൊഴിലില്ലായ്മയും കര്‍ഷകരുടെ ദുരിതവും തിരഞ്ഞെടുപ്പില്‍ വിഷയമാക്കും. രാജ്യത്ത് വിദ്യാഭ്യാസ രീതിയില്‍ മാറ്റമുണ്ടാകണമെന്നും വരും നാളിലെ സാങ്കേതിക വളര്‍ച്ചയ്ക്ക് പര്യാപ്തമായ രീതിയില്‍ എന്‍ജിനീയറിംഗ് വിദ്യാഭ്യാസം മാറണമെന്നും സച്ചിന്‍ പറഞ്ഞു. രണ്ട് കോടി തൊഴില്‍ സൃഷ്ടിക്കുമെന്ന് പറഞ്ഞ മോദി സര്‍ക്കാരിന്റെ കാലത്ത് കഴിഞ്ഞ വര്‍ഷം മാത്രം 1.1 കോടി ജനങ്ങള്‍ക്ക് തൊഴില്‍ നഷ്ടമായെന്ന് ശശി തരൂര്‍ എം.പി പറഞ്ഞു. അടുത്ത തിരഞ്ഞെടുപ്പില്‍ തിരിച്ചുവരില്ലെന്ന് ഉറപ്പുള്ളതിനാലാണ് അവര്‍ ദേശീയ സുരക്ഷയെ വിഷയമാക്കുന്നത്. ഹോട്ടല്‍ റസിഡന്‍സി ടവറില്‍ നടന്ന സംവാദത്തില്‍ ആള്‍ ഇന്ത്യ പ്രൊഫഷണല്‍സ് കോണ്‍ഗ്രസ് സംസ്ഥാന പ്രസിഡന്റ് ഡോ. മാത്യു കുഴല്‍ നാടന്‍ മോഡറേറ്ററായി.