ശരീരാവശിഷ്ടങ്ങള്‍ക്കിടയില്‍ കുരുന്ന്

റെയില്‍വേ ട്രാക്കില്‍ കഷ്ണങ്ങളായ ശരീരാവശിഷ്ടങ്ങള്‍, അവയ്ക്കിടയില്‍ ഒരുവയസ്സുള്ള കുരുന്ന്. ഹൃദയം തകര്‍ക്കുന്ന ദൃശ്യത്തിനാണ് ഡല്‍ഹിയില്‍ റെയില്‍വേ പൊലീസ് (ആര്‍പിഎഫ്) വ്യാഴാഴ്ച സാക്ഷ്യം വഹിച്ചത്. അമ്മയുടെയും രണ്ട് സഹോദരിമാരുടെയും ചതഞ്ഞരഞ്ഞ മൃതദേഹത്തിന് അരികിലായിരുന്നു കുരുന്നുജീവന്‍. വ്യാഴാഴ്ച പുലര്‍ച്ചെ 3.40ന് റെയില്‍വേ പൊലീസിനൊരു ഫോണ്‍ സന്ദേശമെത്തി. സ്ത്രീയുടെയും രണ്ടു പെണ്‍കുട്ടികളുടെയും ശരീരത്തില്‍ ട്രെയിന്‍ കയറിയിറങ്ങിയെന്നായിരുന്നു സന്ദേശം. വടക്കുപടിഞ്ഞാറന്‍ ഡല്‍ഹിയിലെ മണ്ഡാവാലിയിലായിരുന്നു സംഭവം. ഏകദേശം 30 വയസ്സുപ്രായം വരുന്ന സ്ത്രീയും രണ്ട് പെണ്‍കുട്ടികളും ട്രെയിനിടിച്ച് മരിച്ചതിന്റെ ദൃശ്യങ്ങളാണ് ഇവിടെയെത്തിയപ്പോള്‍ കണ്ടതെന്ന് ഡപ്യൂട്ടി കമ്മിഷണര്‍ ഓഫ് പൊലീസ് (റെയില്‍വേ) ഹരേന്ദ്ര സിങ് പറഞ്ഞു. റെയില്‍വേ ട്രാക്കില്‍ ശരീരാവശിഷ്ടങ്ങള്‍ക്കടുത്ത് ഒരു വയസ്സുള്ള കുട്ടി ജീവനോടെ കിടക്കുന്നുണ്ടായിരുന്നു. ട്രാക്കിലിരുന്ന കരയുകയായിരുന്നു കുരുന്നെന്നും അദ്ദേഹം പറഞ്ഞു. ആശുപത്രിയിലേക്കു മാറ്റിയ കുഞ്ഞിന്റെ ആരോഗ്യനില തൃപ്തികരമാണ്. മൃതദേഹത്തിനരികില്‍നിന്ന് കണ്ടെത്തിയ മൊബൈല്‍ ഫോണുപയോഗിച്ച് മരിച്ചവരെ തിരിച്ചറിഞ്ഞിട്ടുണ്ട്. മുപ്പതുകാരിയായ കിരണെന്ന യുവതിയും മക്കളുമാണ് മരിച്ചത്. ഓട്ടോറിക്ഷ ഡ്രൈവറായ ഭര്‍ത്താവിനോട് വഴക്കുണ്ടാക്കി ഇറങ്ങിയതാണെന്നു പൊലീസ് അറിയിച്ചു.