സച്ചിന്‍ നിന്നാല്‍ താനില്ല ഗലോട്ട്

  സച്ചിന്‍ പൈലറ്റിനെ കോണ്‍ഗ്രസ് ക്യാമ്പില്‍ ഉറപ്പിച്ചു നിര്‍ത്താന്‍ സോണിയാഗാന്ധി അക്ഷീണ പ്രയത്‌നം നടത്തുമ്പോള്‍ അതിനെതിരെ സമര്‍ദ തന്ത്രവുമായി അശോക് ഗലോട്ട് സംഘം. പാര്‍ട്ടിയെ തകര്‍ക്കാന്‍ ബി ജെ പി യുമായി ഗൂഡാലോചന നടത്തിയ ആള്‍ക്കൊപ്പം തങ്ങളില്ലന്ന നിലപാടിലാണിവര്‍. ഇക്കാര്യം എ ഐ സി സി യിലെ മുതിര്‍ന്ന നേതാക്കളെ ഇവര്‍ അറിയിച്ചു കഴിഞ്ഞു. സച്ചിനെതിരെ കൂടുതല്‍ കടുത്ത ആരോപണങ്ങള്‍ ഗലോട്ട് പക്ഷം പുറത്തുവിടുന്നത് ഇതിന്റെ പശ്ചാതലത്തിലാണ്. കഴിഞ്ഞ ദിവസം സച്ചിനെതിരെ കടുത്ത നിലപാടാണ് ഗലോട്ട് പരസ്യമായി സ്വീകരിച്ചത് , കമല്‍ നാഥിന്റെ പിന്‍തുണയും ഗലോട്ടിനുണ്ട്. സംസ്ഥാന സര്‍ക്കാരിനെ അട്ടിമറിക്കാന്‍ ആറുമാസമായി ബിജെപി നടത്തുന്ന ശ്രമങ്ങളില്‍ സച്ചിന്‍ പൈലറ്റ് പങ്കാളി ആയിരുന്നെന്ന് ഗെഹ്ലോട്ട് ആരോപിച്ചു. സച്ചിന്‍ പാര്‍ട്ടിയെ പിന്നില്‍ നിന്നു കുത്തുകയായിരുന്നു. സത്യം എക്കാലത്തും ജയിക്കും. രാജസ്ഥാനിലെ കോണ്‍ഗ്രസ് സര്‍ക്കാര്‍ സുരക്ഷിതമാണ്-ഗെഹ്ലോട്ട് കൂട്ടിച്ചേര്‍ത്തു. ബിജെപിയിലേക്കു ചാടാന്‍ സച്ചിന്‍ പൈലറ്റ് തനിക്ക് 35 കോടി രൂപ വാഗ്ദാനം ചെയ്തുവെന്നാരോപിച്ച് കോണ്‍ഗ്രസ് എംഎല്‍എ ഗിരിരാജ് സിംഗ് മലിംഗ രംഗത്തെത്തി. കഴിഞ്ഞ ഡിസംബറിലാണ് സച്ചിന്‍ പൈലറ്റ് പണം വാഗ്ദാനം ചെയ്തതെന്നും അദ്ദേഹം പറഞ്ഞു. ചരിത്രത്തില്‍ ഒരിക്കലും ഒരു പാര്‍ട്ടിയുടെ അധ്യക്ഷന്‍ സ്വന്തം പാര്‍ട്ടിയോട് ഇങ്ങനെ ചെയ്തിട്ടുണ്ടാവില്ല എന്നാണ് ഈ ആരോപണത്തോട് ഗെഹ്ലോട്ട് പ്രതികരിച്ചത്. എന്നാല്‍, മലിംഗയുടെ ആരോണത്തിനെതിരേ മാനനഷ്ടക്കേസ് നല്‍കുമെന്നു സച്ചിന്‍ പൈലറ്റ് പറഞ്ഞു.