കെ ഫോണ്‍ ; ലക്ഷ്യം ബിഎസ്എന്‍എല്‍

നാട്ടുമ്പുറത്തും അതിവേഗ ഇന്റര്‍നെറ്റ് ചെറിയ ചെലവില്‍ എത്തിക്കുന്ന സംസ്ഥാന സര്‍ക്കാരിന്റെ കെ ഫോണ്‍ പദ്ധതിയെ തകര്‍ക്കാന്‍ ശ്രമിക്കുന്നത് കേരളത്തില്‍ വേരോട്ടമുള്ള രണ്ട് വന്‍ കമ്പനികള്‍. . 20 ലക്ഷം കുടുംബങ്ങള്‍ക്ക് സൗജന്യമായും മറ്റുള്ളവര്‍ക്ക് സബ്സിഡി നിരക്കിലും ഇന്റര്‍നെറ്റ് ലഭിക്കുന്ന പദ്ധതിയാണിത്. സംസ്ഥാനത്തെ മുഴുവന്‍ സര്‍ക്കാര്‍ ഓഫീസുകളിലും കെഫോണ്‍ കണക്ഷന്‍ നല്‍കും. ഡിസംബറില്‍ പൂര്‍ത്തിയാകുന്ന പദ്ധതി കേരളത്തില്‍ വലിയ കച്ചവടം നടത്തുന്ന കമ്പനികള്‍ക്ക് വലിയ തിരിച്ചടി ആരും. നിലവിലെ സാഹചര്യം അനുസരിച്ച് ബി എസ് എന്‍ എല്‍ ആയിരിക്കും കെ ഫോണിന് ഇന്റെര്‍ നെറ്റ് നല്‍കുക. അതിനാലാണ് ആരോപണമുന്നയിച്ച് പദ്ധതിയെ ഇല്ലാതാക്കാന്‍ ഈ കമ്പനികളുടെ ഒത്താശയോടെ ചിലര്‍ രംഗത്തിറങ്ങിയത്. സംസ്ഥാനത്തെ ഡാറ്റാ വിപണിയില്‍ 90 ശതമാനവും റിലയന്‍സ്, വോഡഫോണ്‍, എയര്‍ടെല്‍ കമ്പനികള്‍ക്കാണ്. കേബിള്‍ വഴി ഏഷ്യാനെറ്റും റെയില്‍വയറും രംഗത്തുണ്ട്. കെ ഫോണിനെ വിവാദത്തിലാക്കുമ്പോള്‍ സംരക്ഷിക്കുന്നത് ഈ കമ്പനികളുടെ താല്‍പ്പര്യമാണ്. ഇന്റര്‍നെറ്റ് പൗരാവകാശമായി പ്രഖ്യാപിച്ച രാജ്യത്തെ ആദ്യ സംസ്ഥാനമാണ് കേരളം. ഇന്റര്‍നെറ്റ് ആന്‍ഡ് മൊബൈല്‍ അസോസിയേഷന്‍ ഓഫ് ഇന്ത്യയുടെ 2019 നവംബറിലെ റിപ്പോര്‍ട്ട് പ്രകാരം ഇന്റര്‍നെറ്റ് ഉപയോഗത്തില്‍ രാജ്യത്ത് രണ്ടാമതാണ് കേരളം. ഡല്‍ഹി മാത്രമാണ് മുന്നില്‍. സംസ്ഥാനത്തെ നാലു കോടിയിലേറെ മൊബൈല്‍ കണക്ഷനില്‍ മൂന്നു കോടിയിലധികവും ബ്രോഡ് ബാന്‍ഡ് കണക്ഷന്‍ മിക്കതും സ്വകാര്യ കമ്പനികളുടെതാണ്. യാഥാര്‍ഥ്യമായാല്‍ കുത്തകകളുടെ കാലിടറും കുറഞ്ഞ ചെലവില്‍ ഗുണമേന്മയുള്ള ഇന്റര്‍നെറ്റ് ലഭ്യമാക്കുന്ന കെ ഫോണ്‍ പദ്ധതി യാഥാര്‍ഥ്യമായാല്‍ കേരള വിപണിയില്‍ കുത്തകകളുടെ കാലിടറും. നിലനില്‍ക്കണമെങ്കില്‍ ഈടാക്കുന്ന തുക കുറയ്ക്കേണ്ടിവരും. കേരള മോഡല്‍ മറ്റ് സംസ്ഥാനങ്ങള്‍ നടപ്പാക്കിയാലുണ്ടാകുന്ന പ്രതിസന്ധിയും കോര്‍പറേറ്റുകള്‍ക്കു മുന്നിലുണ്ട്. 52,000 കിലോമീറ്റര്‍ ഒപ്റ്റിക്കല്‍ ഫൈബര്‍ ശൃംഖലയാണ് കെ ഫോണിനായി ഒരുക്കുന്നത്. ഇത് എല്ലാ സ്വകാര്യ കമ്പനികളെക്കാളും വലുതാണ്. സെക്കന്‍ഡില്‍ 10 എംബി മുതല്‍ ഒരു ജിബിവരെ വേഗതയുണ്ടാകും.