ഡല്‍ഹിയില്‍ അടി കലശല്‍

രാജ്യതലസ്ഥാനത്ത് ലഫ്. ഗവർണറും സംസ്ഥാന സർക്കാരും തമ്മിലുള്ള അഭിപ്രായ വ്യത്യാസം വീണ്ടും പരസ്യമായി. ഭരണകക്ഷിയായ ആം ആദ്മി പാർട്ടി ഒരിക്കൽക്കൂടി ഗവർണറെ വിമർശിച്ച് രംഗത്തുമെത്തി. അൺ ലോക് മൂന്നിന്‍റെ ഭാഗമായി ഹോട്ടലുകളും ആഴ്ച്ചച്ചന്തകളും തുറക്കാനുള്ള ആം ആദ്മി സർക്കാരിന്‍റെ തീരുമാനം ലഫ്. ഗവർണർ അനിൽ ബൈജാൽ തള്ളിക്കളയുകയായിരുന്നു. കൊവിഡ് സാഹചര്യം ഇപ്പോഴും ഗൗരവമുള്ളതാണ്. രോഗവ്യാപന ഭീഷണി ഒഴിഞ്ഞിട്ടില്ല. അതുകൊണ്ടാണ് ലഫ്. ഗവർണർ ഇങ്ങനെയൊരു തീരുമാനമെടുത്തത്- ബൈജാലുമായി അടുത്ത വൃത്തങ്ങൾ പറഞ്ഞു. ലഫ്. ഗവർണറുടെ തീരുമാനം ശരിയല്ലെന്ന് ഡൽഹി സർക്കാർ പ്രതികരിച്ചു. നഗരത്തിലെ സാമ്പത്തിക വ്യവസ്ഥയ്ക്ക് മുന്തിയ പരിഗണന നൽകേണ്ട ഘട്ടമാണിത്. കൊവിഡ് പ്രതിരോധം പ്രധാന വിഷയമായി തന്നെ സർക്കാർ എടുത്തിട്ടുണ്ട്. സർക്കാർ തീരുമാനത്തിൽ ഗവർണർ ഇതുപോലെ ഇടപെടുന്നത് അവസാനിപ്പിക്കണം- ആം ആദ്മി പാർട്ടി കേന്ദ്ര സർക്കാരിനോട് ആവശ്യപ്പെട്ടു. ഡൽഹിയിലെ ജനങ്ങളിൽ കഷ്ടപ്പാടുകൾ അ‍ടിച്ചേൽപ്പിക്കുന്നതിൽ കേന്ദ്ര സർക്കാർ സന്തോഷം കണ്ടെത്തുകയാണെന്ന് എഎപി വക്താവ് രാഘവ് ഛന്ദ കുറ്റപ്പെടുത്തി.