പ്രതിദിന കേസുകള്‍ കൂടുന്നു

രാജ്യത്ത് പുതുതായി കൊവിഡ് സ്ഥിരീകരിക്കുന്നവരിൽ ഒരു ദിവസത്തെ ഏറ്റവും ഉയർന്ന വർധന. ഇന്നു രാവിലെ എട്ടിന് കേന്ദ്ര ആരോഗ്യ മന്ത്രാലയം പുതുക്കിയ കണക്കുപ്രകാരം അവസാന 24 മണിക്കൂറിൽ രോഗം സ്ഥിരീകരിച്ചത് 69,652 പേർക്ക്. ഇതോടെ രാജ്യത്തെ മൊത്തം വൈറസ്ബാധിതർ 28,36,925 ആയി ഉയർന്നു. മരണസംഖ്യ 53,866 ആയിട്ടുണ്ട്. ഇരുപത്തിനാലു മണിക്കൂറിനിടെ മരിച്ചത് 977 പേരാണ്. ഇതുവരെ 20.96 ലക്ഷത്തിലേറെ പേർ രോഗമുക്തരായിട്ടുണ്ട്. ഇപ്പോൾ ചികിത്സയിലുള്ളത് 6,86,395 പേർ. ഒരു ദിവസം നടത്തുന്ന കൊവിഡ് പരിശോധനകളിലും റെക്കോഡാണ് ഇന്നലെ. 9.18 ലക്ഷത്തിലേറെ സാംപിളുകളാണ് 24 മണിക്കൂറിനിടെ പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് എട്ടു ശതമാനത്തിൽ താഴെയാണെന്ന് ആഭ്യന്തര മന്ത്രാലയം. കൂടുതൽ പരിശോധനകൾ നടത്തി തുടക്കത്തിൽ തന്നെ രോഗബാധിതരെ കണ്ടെത്തി ചികിത്സ നൽകുന്നത് വെന്‍റിലേറ്റർ സഹായം ആവശ്യമുള്ള രോഗികളുടെ തോത് കുറയ്ക്കുന്നുണ്ടെന്നും ആരോഗ്യ മന്ത്രാലയം വ്യക്തമാക്കുന്നു. രോഗവ്യാപനത്തിൽ രാജ്യത്ത് മുൻപന്തിയിലുള്ള മഹാരാഷ്ട്രയിൽ ഏറ്റവും ഉയർന്ന പ്രതിദിന വർധനയാണ് അവസാന 24 മണിക്കൂറിലുണ്ടായത്. 13,165 പേർക്ക് സംസ്ഥാനത്ത് പുതുതായി രോഗബാധ കണ്ടെത്തി. ഇതോടെ സംസ്ഥാനത്തെ മൊത്തം കേസുകൾ 6.28 ലക്ഷം പിന്നിട്ടു. ഇതിൽ 4.46 ലക്ഷം പേരാണ് രോഗമുക്തരായത്. സംസ്ഥാനത്തെ ഇതുവരെയുള്ള കൊവിഡ് മരണം 21,033 ആയിട്ടുണ്ട്. 346 പേരുടെ മരണം 24 മണിക്കൂറിനിടെ രേഖപ്പെടുത്തി. 1.60 ലക്ഷത്തിലേറെ ആളുകളാണ് ഇപ്പോൾ മഹാരാഷ്ട്രയിൽ കൊവിഡ് ചികിത്സയിൽ കഴിയുന്നത്. തമിഴ്നാട്ടിലെ മൊത്തം കേസുകൾ 3.55 ലക്ഷം കടന്നു. 2.96 ലക്ഷം പേരാണ് രോഗമുക്തരായത്. 6,123 പേർ ഇതുവരെ മരിച്ചിട്ടുണ്ട്. 5,795 പേർക്കു പുതുതായി രോഗം കണ്ടെത്തി. 116 പേരാണ് ഇന്നലെ വൈറസ് ബാധ മൂലം മരിച്ചത്. രോഗവ്യാപനത്തിൽ മൂന്നാം സ്ഥാനത്തുള്ള ആന്ധ്രപ്രദേശിൽ മൊത്തം കേസുകൾ 3.16 ലക്ഷമായി. 2.26 ലക്ഷം പേരാണ് രോഗമുക്തരായത്. 2,906 പേർ മരിച്ചു. കർണാടകയിലെ മൊത്തം കേസുകൾ 2.49 ലക്ഷമാണ്. 1.64 ലക്ഷത്തിലേറെ പേർ രോഗമുക്തരായപ്പോൾ 4,327 പേർക്ക് മരണം സംഭവിച്ചു. ഉത്തർപ്രദേശിൽ 1.67 ലക്ഷവും ഡൽഹിയിൽ 1.56 ലക്ഷവും പശ്ചിമ ബംഗാളിൽ 1.25 ലക്ഷവും ബിഹാറിൽ 1.12 ലക്ഷവും പേർക്കാണ് ഇതുവരെ രോഗബാധയുണ്ടായിരിക്കുന്നത്. തെലങ്കാനയിൽ 95,000 പിന്നിട്ടു; അസമിലും ഗുജറാത്തിലും 82,000വും.