സിയാൽ , പ്രവർത്തനലാഭം 423.85 കോടി രൂപ

കോവിഡ്‌ മഹാമാരിയുടെ പ്രതികൂലാവസ്ഥയെ നേരിട്ടും 2019–-20 സാമ്പത്തികവർഷത്തെ മൊത്തം പ്രകടനത്തിൽ സുരക്ഷിത ലാൻഡിങ് നടത്തി നെടുമ്പാശേരി അന്താരാഷ്‌ട്ര വിമാനത്താവള അതോറിറ്റി (സിയാൽ). എന്നാൽ, വരുംനാളുകളിൽ കാത്തിരിക്കുന്നത്‌ വലിയ വെല്ലുവിളിയാണെന്ന മുന്നറിയിപ്പും ശനിയാഴ്‌ച ചേരുന്ന സിയാൽ വാർഷിക പൊതുയോഗത്തിൽ അവതരിപ്പിക്കുന്ന റിപ്പോർട്ട്‌ നൽകുന്നു. വിമാന സർവീസുകളുടെയും യാത്രികരുടെയും എണ്ണത്തിലും വ്യോമ–-വ്യോമേതര വരുമാനത്തിലും വൻ ഇടിവുണ്ടായി. മാർച്ച്‌ 31ന്‌ അവസാനിച്ച സാമ്പത്തികവർഷം 655. 05 കോടി രൂപയാണ്‌ ആകെ വരുമാനം. മുൻവർഷം 650. 34 കോടിയായിരുന്നു. പ്രവർത്തനലാഭത്തിലുണ്ടായ നേരിയ വർധനയോടെ 6.35 ശതമാനം വളർച്ചനിരക്കും കൈവരിക്കാനായി. 423.85 കോടി രൂപയാണ്‌ പ്രവർത്തനലാഭം. മുൻവർഷം 398.63 കോടി രൂപയായിരുന്നു. കോവിഡിനെ തുടർന്ന്‌ നിർത്തിവച്ച ആഭ്യന്തര സർവീസുകൾ മെയ്‌ 24ന്‌ പുനരാരംഭിച്ചെങ്കിലും യാത്രികരുടെ എണ്ണത്തിൽ കാര്യമായ വർധന ഉണ്ടായിട്ടില്ല. കഴിഞ്ഞവർഷം ജൂണിൽ നാലുലക്ഷം യാത്രികർ എത്തിയിരുന്നു. ഈവർഷം അത്‌ 70,000 മാത്രമായിരുന്നു. ഒരുവർഷത്തിനിടെയുണ്ടായ ഇടിവ്‌ 80 ശതമാനം. ബുക്കിങ് വരുന്നതിലെ 90 ശതമാനവും ഒരുവശത്തേക്കുള്ള യാത്രാവശ്യത്തിനാണ്‌. മുമ്പ്‌ അത്‌ 40 ശതമാനം മാത്രമായിരുന്നു. കോവിഡിന്റെ ഭീഷണി തുടരുന്നതിനാൽ യാത്രക്കാർക്ക്‌ നഷ്‌ടമായ ആത്മവിശ്വാസം വീണ്ടെടുക്കാനായിട്ടില്ല. വിദേശങ്ങളിലും സ്ഥിതി ഗുരുതരമായി തുടരുന്നതിനാൽ യാത്രാവിലക്കുകൾ നീങ്ങിയിട്ടില്ല. വിദേശ സർവീസുകൾ സെപ്‌തംബറിൽ പുനരാരംഭിക്കുമെന്നാണ്‌ പ്രതീക്ഷ. ലോക്ക്‌ഡൗണിനുമുന്നോടിയായി മാർച്ച്‌ 21നാണ്‌ ആഭ്യന്തര–-വിദേശ സർവീസുകൾ നിർത്തിവച്ചത്‌. സിയാലിൽ കൈകാര്യംചെയ്‌ത വിമാന സർവീസുകളുടെ എണ്ണത്തിലും ഇടിവുണ്ടായി. മുൻവർഷത്തേക്കാൾ 5.73 ശതമാനത്തിന്റെ കുറവാണ്‌ ഉണ്ടായത്‌. വിദേശ യാത്രികരുടെ എണ്ണത്തിൽ 4.70 ശതമാനത്തിന്റെ വർധന രേഖപ്പെടുത്തിയപ്പോൾ, ആഭ്യന്തര യാത്രികരുടെ എണ്ണത്തിൽ 4.91 ശതമാനത്തിന്റെ കുറവുണ്ടായി. യാത്രക്കാരുടെ ആകെ എണ്ണത്തിൽ 4.81 ശതമാനത്തിന്റെ കുറവാണുള്ളത്‌. വിദേശ കാർഗോ കയറ്റിറക്കുമതിയിൽ 4.66 ശതമാനം കുറവുണ്ടായി. ആഭ്യന്തര കാർഗോ നീക്കത്തിൽ 0.60 ശതമാനത്തിന്റെ വർധന രേഖപ്പെടുത്തി. രാജ്യത്ത്‌ ജെറ്റ്‌ വിമാനങ്ങളുടെ സർവീസ്‌ അവസാനിപ്പിച്ചതും വരുമാന നഷ്‌ടത്തിന്‌ കാരണമായതായി റിപ്പോർട്ട്‌ ചൂണ്ടിക്കാണിക്കുന്നു. കോവിഡ്‌ പശ്‌ചാത്തലത്തിൽ വീഡിയോ കോൺഫറൻസിങ്ങിലൂടെയാണ്‌ വാർഷിക പൊതുയോഗം. ആദ്യം എത്തുന്ന ആയിരംപേർക്കാണ്‌ പങ്കെടുക്കാനാകുക. റിമോട്ട്‌ ഇ വോട്ടിങ് ഉൾപ്പെടെ സംവിധാനങ്ങളും ഏർപ്പെടുത്തിയിട്ടുണ്ട്‌.