ബിജെപിക്ക് ജിഡിപി വെല്ലുവിളി

സമ്പദ്‌വ്യവസ്ഥയുടെ തകർച്ചയും വർധിക്കുന്ന തൊഴിലില്ലായ്മയും തൊഴിൽനഷ്ടവും പാർലമെന്റിന്റെ വർഷകാല സമ്മേളനത്തിൽ വിഷയമാക്കാൻ കോൺഗ്രസ് ഒരുങ്ങുന്നു. സമാന ചിന്താഗതിയുള്ള പാർട്ടികളുടെ കൂടി പിന്തുണയോടെ സർക്കാരിനെ നേരിടാനാണു തീരുമാനം. രാജ്യസഭയിലെയും ലോക്സഭയിലെയും 5 എംപിമാർ വീതമുള്ള കമ്മിറ്റി യോഗത്തിൽ ഗുലാംനബി ആസാദ് അധ്യക്ഷത വഹിച്ചു. കേന്ദ്രസർക്കാർ അവതരിപ്പിക്കാൻ ഉദ്ദേശിക്കുന്ന 11 ബില്ലുകളിന്മേലുള്ള നിലപാടിനെക്കുറിച്ചു റിപ്പോർട്ട് തയാറാക്കി പാർട്ടി പ്രസിഡന്റിന് നൽകിയിട്ടുണ്ടെന്ന് കമ്മിറ്റി അംഗം ജയറാം രമേഷ് അറിയിച്ചു. സോണിയ ഗാന്ധിയുടെ സാന്നിധ്യത്തിൽ ഒരുവട്ടം കൂടി യോഗം ചേർന്ന് അന്തിമരൂപം നൽകും. ജിഡിപി വളർച്ച –23.9 ശതമാനമായിട്ടും തൊഴിലില്ലായ്മയും തൊഴിൽനഷ്ടവും രൂക്ഷമായിട്ടും പ്രധാനമന്ത്രി മിണ്ടാത്തതിനെ കേന്ദ്രീകരിച്ചായിരിക്കും കോൺഗ്രസ് നീക്കം. കോവിഡ് മഹാമാരി നേരിടുന്നതിലെ പാളിച്ചകളും ചൂണ്ടിക്കാണിക്കും. പാർലമെന്റ് സമ്മേളനത്തിൽ ചോദ്യോത്തരവേള ഒഴിവാക്കിയതിനെ എതിർക്കും. പിഎം കെയേഴ്സ് ഫണ്ടിലേക്കു സംഭാവന നൽകിയവർക്കു നികുതിയിളവു നൽകാനുള്ള നീക്കത്തെയും എതിർക്കും. കടബാധ്യതാ നിർധനത്വ ചട്ടത്തിൽ കമ്പനികൾക്കനുകൂലമായി വ്യവസ്ഥകൾ കൊണ്ടുവരുന്നതിലെ സർക്കാരിന്റെ ഉദ്ദേശ്യത്തെയും പാർട്ടി സംശയത്തോടെയാണു കാണുന്നത്. ചെറുകിട, ഇടത്തരം വ്യവസായ മേഖലയിലെ തകർച്ച, അതിർത്തിയിൽ ചൈനയുടെ കയ്യേറ്റ വിഷയത്തിലെ സർക്കാർ നിലപാട്, ജിഎസ്ടി വിഹിതം സംസ്ഥാനങ്ങൾക്കു കൊടുക്കാത്തത്, ഇതരസംസ്ഥാനത്തൊഴിലാളികളുടെ കഷ്ടപ്പാടുകൾ തുടങ്ങിയവയും ഉന്നയിക്കും. കോഓർഡിനേഷൻ കമ്മിറ്റി യോഗത്തിൽ എഐസിസി ജനറൽ സെക്രട്ടറി കെ.സി.വേണുഗോപാൽ, ആനന്ദ് ശർമ തുടങ്ങിയവരും പങ്കെടുത്തു. പാർലമെന്റിൽ ശൂന്യവേളയുടെ സമയം അരമണിക്കൂറായി കുറയ്ക്കുന്നതിനെക്കുറിച്ചു ലോക്സഭാ സ്പീക്കറോടും രാജ്യസഭാ ചെയർമാനോടും സർക്കാർ അഭിപ്രായമാരാഞ്ഞു. ചോദ്യോത്തരവേള ഇല്ലാത്ത സാഹചര്യത്തിൽ നക്ഷത്രചിഹ്നമിടാത്ത ചോദ്യങ്ങൾ സഭയിൽ വായിക്കുന്നതിന്റെ സാധ്യതയും പരിശോധിക്കുന്നുണ്ട്. ശൂന്യവേള അരമണിക്കൂറാക്കുന്നതു സംബന്ധിച്ച് സ്പീക്കറും രാജ്യസഭാ ചെയർമാനുമാണു തീരുമാനമെടുക്കേണ്ടതെന്നു പാർലമെന്ററികാര്യ മന്ത്രി പ്രൾഹാദ് ജോഷി പറഞ്ഞു. ചോദ്യോത്തരവേള ഉണ്ടാകില്ലെന്ന് രാജ്യസഭയുടെയും ലോക്സഭയുടെയും വിജ്ഞാപനങ്ങളിൽ പറഞ്ഞിരുന്നു. എന്നാൽ നക്ഷത്രചിഹ്നമിടാത്ത, ഉത്തരങ്ങൾ എഴുതി നൽകുന്ന ചോദ്യങ്ങൾ അനുവദിക്കുമെന്നു സർക്കാർ വ്യക്തമാക്കിയിരുന്നു. ചോദ്യോത്തരവേള വേണ്ടെന്നു വച്ചതിനെതിരെ പ്രതിപക്ഷം കടുത്ത പ്രതിഷേധത്തിലാണ്.