മംഗളൂരുവിൽ സ്വര്‍ണബിസ്‌കറ്റുകള്‍ പിടികൂടി

മംഗളൂരു: ഞായറാഴ്ച വൈകിട്ട് മംഗളൂരു അന്താരാഷ്ട്രവിമാനത്താവളത്തില്‍ നിന്ന് കസ്റ്റംസ് എയര്‍ ഇന്റലിജിന്‍സ് വിഭാഗം 33.38ലക്ഷം രൂപ വിലമതിക്കുന്ന സ്വര്‍ണബിസ്‌കറ്റുകള്‍ പിടികൂടി. വിമാനത്തിലെ സീറ്റിനടിയില്‍ ഒളിപ്പിച്ചിരുന്ന 83.875 പവന്‍ വരുന്ന സ്വര്‍ണബിസ്‌കറ്റുകളാണ് പിടികൂടിയത്. ദുബായില്‍ നിന്ന് മംഗളൂരുവിലെത്തി ഹൈദരാബാദിലേക്ക് സര്‍വീസ് നടത്തുന്ന ഇന്റിഗോ വിമാനത്തിലാണ് സ്വര്‍ണം കടത്താനുള്ള ശ്രമമുണ്ടായത്.രഹസ്യവിവരത്തെ തുടര്‍ന്നാണ് മംഗളൂരു കസ്റ്റംസ് വിമാനത്തില്‍ പരിശോധന നടത്തിയത്. ഹൈദരാബാദിലേക്ക് സ്വര്‍ണം കടത്താനുള്ള ശ്രമമാണ് നടന്നതെന്ന് കരുതുന്നു. ദുബായില്‍ നിന്ന് വിമാനത്തില്‍ കയറിയ ആള്‍ സ്വര്‍ണം സീറ്റിനടിയില്‍ ഒളിപ്പിച്ച് മംഗളൂരുവില്‍ ഇറങ്ങിയിട്ടുണ്ടാകുമെന്ന് കസ്റ്റംസ് അധികൃതര്‍ കരുതുന്നു. ഇവിടെ നിന്ന് ഹൈദരാബാദിലേക്കുള്ള യാത്രയില്‍ മംഗളൂരുവില്‍ നിന്ന് മറ്റൊരാള്‍ കയറി സ്വര്‍ണമെടുത്ത് ഹൈദരാബാദ് വിമാനത്താവളം വഴി പുറത്ത് എത്തിക്കാനുള്ള പദ്ധതിയാണെന്നാണ് കസ്റ്റംസ് അധികൃതര്‍ വ്യക്തമാക്കുന്നത്.സീറ്റില്‍ യാത്ര ചെയ്ത ആളെയും ഹൈദരാബാദിലേക്ക് ഇതേ വിമാനത്തില്‍ യാത്ര ചെയ്യാനിരുന്ന ആളുകളെയും കേന്ദ്രീകരിച്ച് കസ്റ്റംസ് അന്വേഷണം നടത്തിവരികയാണ്.