ഭയം മാറി ജനം തെരുവിലിറങ്ങി കേരളത്തില്‍ വ്യാപനം അതിതീവ്രം

രാഷ്ട്രീയ പാര്‍ട്ടികള്‍വാശിയോടെ നടത്തിയ ആള്‍ക്കൂട്ട സമരങ്ങള്‍ കേരളത്തിന് നല്‍കിയ കൊവിഡ് അതിവ്യാപനം കേരളത്തെ എത്തിച്ചിരിക്കുന്നത്‌രാജ്യത്ത് രണ്ടാം സ്ഥാനത്ത്.

കേസുകളുടെ പ്രതിദിന വര്‍ധനയില്‍ കേരളം കര്‍ണാടകയെയും പിന്തള്ളി രണ്ടാം സ്ഥാനത്ത്. ഇന്നലെ മഹാരാഷ്ട്രയില്‍ 15,591 പുതിയ കേസുകള്‍ സ്ഥിരീകരിച്ചു. കേരളത്തില്‍ 9,258 പുതിയ രോഗികളെയാണു കണ്ടെത്തിയത്. കര്‍ണാടകയില്‍ 8,793 പേരാണ് ഇന്നലെ പോസിറ്റീവായത്. കേരളത്തില്‍ 63,175 സാംപിളുകള്‍ പരിശോധിച്ചപ്പോള്‍ കര്‍ണാടകയില്‍ 92,059 സാംപിളുകള്‍ ഇന്നലെ പരിശോധിച്ചു. കര്‍ണാടകയില്‍ രോഗവ്യാപനത്തിന് നേരിയ കുറവുള്ളപ്പോള്‍ കേരളത്തിലെ വ്യാപനത്തോത് വര്‍ധിച്ചുവരികയാണ്. ആളുകളുടെ ഭയം കുറഞ്ഞ് വിലക്കുകള്‍ മറികടക്കുന്നതാണ് കേരളത്തില്‍ രോഗ്വ്യാപനം കൂടാന്‍ കാരണമായതെന്ന് വിദഗധര്‍ വിലയിരുത്തുന്നു.

അതേസമയം, കര്‍ണാടകയിലെ മരണസംഖ്യ 9,000 കടന്നിട്ടുണ്ട്. മൊത്തം രോഗബാധിതര്‍ 6.20 ലക്ഷത്തിലെത്തുകയും ചെയ്തു. 1,11,986 പേരാണ് ഇപ്പോള്‍ കര്‍ണാടകയില്‍ ചികിത്സയിലുള്ളത്. 125 പേര്‍ ഇന്നലെ കര്‍ണാടകയില്‍ മരിച്ചു. ഇതോടെ മരണസംഖ്യ 9119 ആയതായി സംസ്ഥാന ആരോഗ്യ വകുപ്പ്.

കേരളത്തില്‍ 20 മരണമാണ് ഇന്നലെ രേഖപ്പെടുത്തിയത്. ഇതോടെ സംസ്ഥാനത്തെ മരണസംഖ്യ 791 ആയി. 2,12,499 പേര്‍ക്ക് ഇതുവരെ രോഗം ബാധിച്ച കേരളത്തില്‍ 77,482 പേരാണ് ഇപ്പോള്‍ ചികിത്സയിലുള്ളത്. കര്‍ണാടകയിലെ ബംഗളൂരുവാണ് രാജ്യത്തു തന്നെ ഏറ്റവും കൂടിയ തോതില്‍ ഇപ്പോള്‍ രോഗബാധയുള്ള നഗരം. ബംഗളൂരു അര്‍ബനില്‍ ഇന്നലെ കണ്ടെത്തിയത് 4,259 കേസുകളാണ്.

ആന്ധ്രപ്രദേശില്‍ 6,555 പുതിയ കേസുകള്‍ കണ്ടെത്തിയപ്പോള്‍ 7,485 പേര്‍ രോഗമുക്തരായിട്ടുണ്ട്. സംസ്ഥാനത്തെ മൊത്തം കേസുകള്‍ 7.06 ലക്ഷം കടന്നു. മരണസംഖ്യ 5,900. ഇപ്പോള്‍ ചികിത്സയിലുള്ളവര്‍ കേരളത്തിലുള്ളതിലും കുറവാണ്- 56,897. തമിഴ്‌നാട്ടില്‍ 5,595 പേര്‍ക്കു കൂടിയാണു രോഗം കണ്ടെത്തിയത്. 6.08 ലക്ഷത്തിലേറെ രോഗബാധിതരുള്ള സംസ്ഥാനത്ത് ഇപ്പോള്‍ ചികിത്സയിലുള്ളത് 46,294 പേര്‍. 67 പേര്‍ കൂടി തമിഴകത്തു മരിച്ചു. സംസ്ഥാനത്തെ ഇതുവരെയുള്ള മരണസംഖ്യ 9,653.

മൊത്തം കേസുകളിലും രോഗവ്യാപനത്തിലും ഇപ്പോഴും രാജ്യത്ത് ഒന്നാം സ്ഥാനത്താണു മഹാരാഷ്ട്ര. മൊത്തം കേസുകള്‍ 14.16 ലക്ഷത്തിലെത്തിയ സംസ്ഥാനത്ത് 37,480 പേര്‍ മരിച്ചുകഴിഞ്ഞു. 2.60 ലക്ഷത്തിലേറെ ആക്റ്റിവ് കേസുകളുണ്ട് മഹാരാഷ്ട്രയില്‍. 2.65 ശതമാനം മരണനിരക്കുമുണ്ട്. മുംബൈ നഗരത്തിലെ മാത്രം ഇതുവരെയുള്ള രോഗബാധിതര്‍ രണ്ടു ലക്ഷത്തിലേറെയാണ്.

മൊത്തം കേസുകള്‍ 4.06 ലക്ഷമായ ഉത്തര്‍പ്രദേശില്‍ ഇന്നലെ സ്ഥിരീകരിച്ചത് 3,946 പോസിറ്റീവ് കേസുകളാണ്. 5,917 പേര്‍ സംസ്ഥാനത്ത് ഇതുവരെ മരിച്ചിട്ടുണ്ട്. 49,112 ആക്റ്റിവ് കേസുകളാണ് യുപിയിലുള്ളത്.