വാക് സീന്‍ ബ്രിട്ടനില്‍ ക്രിസ്മസോടെ

ഓക്സ്ഫഡ് കോവിഡ് വാക്സീന് ഡിസംബറില്‍ത്തന്നെ അംഗീകാരം ലഭിക്കുമെന്ന് സൂചന. ബ്രിട്ടീഷ് സര്‍ക്കാര്‍ വൃത്തങ്ങളില്‍നിന്നുള്ള സൂചനകള്‍ പ്രകാരമാണ് വിദേശമാധ്യമങ്ങളുടെ റിപ്പോര്‍ട്ട്. അംഗീകാരം ലഭിച്ചാലും ആറുമാസമോ അതില്‍ അധികമോ കഴിഞ്ഞാല്‍ മാത്രമേ കൂടുതല്‍ പേരിലേയ്ക്ക് എത്തിക്കാനാവൂ എന്നാണ് വിലിയിരുത്തല്‍. ഇന്ത്യയില്‍ നടക്കുന്ന പരീക്ഷണവും ഡിസംബറോടെ പൂര്‍ത്തിയായേക്കും. 

ഒാക്സ്ഫഡ് സര്‍വകലാശാലയും മരുന്ന് കമ്പനിയായ അസ്ട്രാസെനകയും ചേര്‍ന്ന് വികസിപ്പിക്കുന്ന വാക്സീന്‍ ബ്രിട്ടനില്‍ ക്രിസ്മസോടെ എത്തിയേക്കുമെന്നാണ് റിപ്പോര്‍ട്ട്. തിരിച്ചടികളുണ്ടായില്ലെങ്കില്‍ ഇന്ത്യയില്‍ പുണയിലെ സീറം ഇന്‍സ്റ്റിറ്റ്യൂട്ട് നടത്തുന്ന പരീക്ഷണവും ഡിസംബറില്‍ത്തന്നെ പൂര്‍ത്തിയാകും. ഇന്ത്യയില്‍ പരീക്ഷിച്ച് വിജയമുറപ്പിച്ചാല്‍ മാത്രമേ ഇന്ത്യയില്‍ അംഗീകാരം ലഭിക്കൂ. ഇന്ത്യയില്‍ ഇതുവരെ വാക്സീന്‍ സ്വീകരിച്ച ആരിലും പാര്‍ശ്വഫലങ്ങളൊന്നും തന്നെയില്ല. പലരും രണ്ടാംഡോസ് വാക്സീന്‍ സ്വീകരിച്ചു. ബ്രിട്ടനില്‍ ഒരാളില്‍ പാര്‍ശ്വഫലം കണ്ടെത്തിയതിനെത്തുടര്‍ന്ന് പരീക്ഷണം നിര്‍ത്തിവച്ചിരുന്നു. 

ബ്രിട്ടനില്‍ മൂന്നുദിവസവും ഇന്ത്യയില്‍ ആറുദിവസവും മാത്രമാണ് പരീക്ഷണം നിര്‍ത്തിവച്ചത്. അതുകൊണ്ടുതന്നെ അത് വാക്സീന്‍ വിപണിയിലെത്തുന്നതിന് കാലതാമസമുണ്ടാക്കില്ല. അവസാനഘട്ട പരീക്ഷണത്തിലുള്ള അമേരിക്കയിലെ മൊഡേണ കമ്പനി വികസിപ്പിക്കുന്ന വാക്സീന്‍ പ്രായമായവരിലും സുരക്ഷിതമാണെന്ന്  പഠന റിപ്പോര്‍ട്ട്. തലവേദന, ക്ഷീണം, ശരീരവേദന, വിറയല്‍, കുത്തിവയ്പെടുത്ത സ്ഥലത്ത് വേദന തുടങ്ങിയ പാര്‍ശ്വഫലങ്ങള്‍ ചിലരില്‍ കണ്ടെത്തിയിട്ടുണ്ട്. ഇത് സാധാരമാണെന്നും ആശങ്കപ്പെടേണ്ടതില്ലെന്നുമാണ് വിലയിരുത്തല്‍.