രസതന്ത്ര നൊബേല്‍ രണ്ട് വനിതകള്‍ക്ക്

ഈ വര്‍ഷത്തെ രസതന്ത്ര നൊബേല്‍ പുരസ്‌കാരം രണ്ട് വനിതകള്‍ക്ക്. ഫ്രാന്‍സില്‍ നിന്നുള്ള ഇമ്മാനുവേല്‍ ചാര്‍പന്റിയറിനും അമേരിക്കയില്‍ നിന്നുള്ള ജെന്നിഫര്‍ എ ഡൗഡ്നക്കുമാണ് നൊബേല്‍ ലഭിച്ചിരിക്കുന്നത്. ജീനോം എഡിറ്റിനുള്ള പുതിയ രീതിയുടെ കണ്ടെത്തലിനാണ് പുരസ്‌കാരം. ജനിതക രോഗങ്ങള്‍ക്ക് പരിഹാരം കണ്ടെത്താന്‍ ഇവരുടെ കണ്ടുപിടുത്തം സഹായകമാവുമെന്ന് പുരസ്‌കാര നിര്‍ണയ സമിതി വിലയിരുത്തി. ജര്‍മനിയിലെ മാക്സ് പ്ലാങ്ക് യൂണിറ്റ് ഫോര്‍ സയന്‍സ് ഓഫ് പാത്തോജന്‍സ് മേധാവിയാണ് ഇമ്മാനുവേല്‍ ചാര്‍പന്റിയര്‍. ബെര്‍ക്കിലി സര്‍വകലാശാലയിലെ അധ്യാപികയാണ് ജെന്നിഫര്‍ എ ഡൗഡ്ന. സ്റ്റോക്ക്ഹോമിലെ റോയല്‍ സ്വീഡിഷ് അക്കാദമി ഓഫ് സയന്‍സില്‍ വച്ചായിരുന്നു പുരസ്‌കാര പ്രഖ്യാപനം. ഇവര്‍ കണ്ടെത്തിയ ജനിറ്റിക് ടൂളിന് വലിയ ശക്തിയുണ്ടെന്നും പുരസ്‌കാര സമിതി. ചികിത്സകള്‍ക്കും നൂതന കാര്‍ഷിക വിളകള്‍ വികസിപ്പിക്കാനും ഈ കണ്ടുപിടുത്തം സഹായിക്കും. ജനിതകമായ പ്രശ്നങ്ങള്‍ എഡിറ്റ് ചെയ്ത് പരിഹരിക്കാന്‍ ഇവരുടെ കണ്ടെത്തല്‍ സഹായകമായെന്നും സമിതി.