സമൂഹമാധ്യമത്തിലൂടെ പരിചയപ്പെട്ടു പീഡനം: യൂ ട്യൂബര്‍ അറസ്റ്റില്‍

ഫേസ്ബുക്കിലൂടെ പരിചയപ്പെട്ട പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച ശേഷം സോഷ്യല്‍ മീഡിയ അക്കൗണ്ട് ഡിലീറ്റ് ചെയ്ത് മുങ്ങിയ കാമുകന്‍ അറസ്റ്റില്‍. യൂ ട്യൂബര്‍ പെരുമ്പാവൂര്‍ അറക്കപ്പടി കൊക്കാടി ആഷിക് (23)ആണ് മൂവാറ്റുപുഴ പൊലീസിന്റെ പിടിയിലായത്. രണ്ടു മാസം മുമ്പ് ഫേസ്ബുക്കിലൂടെ പരിചയപ്പെട്ട പെണ്‍കുട്ടിയെ ബൈക്കില്‍ കയറ്റി മൂന്നാറില്‍ കൊണ്ടുപോയാണ് പീഡനത്തിന് ഇരയാക്കിയത്. പിന്നീടു പെണ്‍കുട്ടിയുടെ വീടിനടുത്ത് കൊണ്ടുവിടുകയും ഫേസ്ബുക്കും ഫോണ്‍നമ്പറും പെണ്‍കുട്ടിയുടെ ഫോണില്‍ നിന്നും ഡിലീറ്റു ചെയ്തു മുങ്ങുകയുമായിരുന്നു. തിരിച്ചെത്തിയ പെണ്‍കുട്ടി വീട്ടുകാരോട് പീഡന വിവരം തുറന്നു പറഞ്ഞു. മൂവാറ്റുപുഴ സര്‍ക്കിള്‍ഇന്‍സ്പെക്റ്റര്‍ എം.എ മുഹമ്മദിന്റെ നേതൃത്വത്തിലുള്ള സംഘം സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പിടിയിലായത്. കോടതിയില്‍ ഹാജരാക്കി റിമാന്‍ഡ് ചെയ്തു. സ്വന്തമായി യൂട്യൂബ് ചാനല്‍ ഉള്‍പ്പടെ ഉള്ള പ്രതിയുടെ മൊബൈല്‍ ഫോണില്‍ സൗന്ദര്യവര്‍ധക ആപ്പുകള്‍ നിരവധി ആണ്.