ടിആര്‍പി തട്ടിപ്പ് കേസില്‍ ചോദ്യം ചെയ്യലിനു ഹാജരാകാന്‍ അര്‍ണബിന്റെ ചാനലിന് നോട്ടീസ്

ടെലിവിഷന്‍ റേറ്റിംഗ് പോയിന്റ് (ടിആര്‍പി)യില്‍ കൃത്രിമം കാണിച്ച സംഭവത്തില്‍ അര്‍ണബ് ഗോസ്വാമിയുടെ നേതൃത്വത്തിലുള്ള റിപ്പബ്ലിക് ചാനല്‍ അധികൃതര്‍ക്ക് ചോദ്യം ചെയ്യലിനു ഹാജരാകാന്‍ നോട്ടീസ്. റിപ്പബ്ലിക് ടിവി ചീഫ് ഫിനാഷ്യല്‍ ഓഫീസര്‍ക്കാണ് (സിഎഫ്ഒ) മുംബൈ പൊലീസ് നോട്ടീസ് അയച്ചത്.
സിഎഫ്ഒ ശിവ സുബ്രഹ്മണ്യം ശനിയാഴ്ച ഹാജരാകണമെന്നാണ് നോട്ടീസില്‍ ആവശ്യപ്പെട്ടിരിക്കുന്നത്. റിപ്പബ്ലിക് ടിവിയുടെ അക്കൗണ്ടുകളുടെ ''ഫോറന്‍സിക് ഓഡിറ്റ്'' നടത്താനാണ് പൊലീസ് ഉദേശിക്കുന്നത്. ആരോപണവിധേയമായ മറ്റ് രണ്ട് ചാനലുകളുടെ അക്കൗണ്ടന്റുമാരെയും രണ്ട് പരസ്യ ഏജന്‍സികളില്‍ നിന്നുള്ളവരെയും പോലീസ് വിളിപ്പിച്ചിട്ടുണ്ട്.
റിപ്പബ്ലിക് ചാനല്‍ ഉള്‍പ്പെടെ മൂന്ന് ചാനലുകള്‍ക്കെതിരെയാണ് പൊലീസ് കേസെടുത്തത്. ഫക്ത് മറാത്തി, ബോക്സ് സിനിമ എന്നിവയാണ് ആരോപണവിധേയമായ മറ്റ് രണ്ട് ചാനല്‍.
ഒരു പ്രത്യേക ചാനലുകള്‍ എത്രയാളുകള്‍ കാണുന്നു എന്നു കണക്കാക്കുകയാണ് ടിആര്‍പിയിലൂടെ ചെയ്യുന്നത്. ബ്രോഡ്കാസ്റ്റ് ഓഡിയന്‍സ് റിസര്‍ച്ച് കൗണ്‍സി ല്‍(ബിഎആര്‍സി) ആണ് ഇന്ത്യയില്‍ ചാനലുകളുടെ ടിആര്‍പി കണക്കാക്കുന്നത്. ഓരോ ആഴ്ചയിലും ബിഎആര്‍സി റേറ്റിംഗ് പുറത്തുവിടാറുണ്ട്. ടിആര്‍പി കണക്കാക്കാന്‍ മുപ്പതിനായിരത്തിലധികം ബാരോമീറ്ററുകളാണു രാജ്യത്താകെ സ്ഥാപിച്ചിട്ടുള്ളത്.