ഒമാന്‍ സുല്‍ത്താന്റെ നയങ്ങള്‍ക്ക് ഫ്രഞ്ച് മാസികയുടെ പ്രശംസ

സുല്‍ത്താന്‍ ഹൈതം ബിന്‍ താരീഖിന്റെ ഭരണനയങ്ങളെ പ്രകീര്‍ത്തിച്ച് ഫ്രഞ്ച് മാസിക. സാമ്പത്തിക വൈവിധ്യവത്കരണത്തിനും ആധുനിക വത്കരണത്തിനും മുന്‍ഗണന നല്‍കിയുള്ള നയങ്ങളാണ് സുല്‍ത്താന്‍ നടപ്പില്‍ വരുത്തുന്നതെന്ന് ഫ്രഞ്ച് മാസികയായ ലെക്ലെസ് ഡ്യൂ മോയെന്‍ ഓറിയന്റില്‍ പ്രസിദ്ധീകരിച്ച ലേഖനത്തില്‍ പറയുന്നു.
സ്വപ്ന പദ്ധതിയായ ഒമാന്‍ വിഷന്‍ 2040ന്റെ ഭാഗമായ പ്രവര്‍ത്തനങ്ങള്‍ തടസമില്ലാതെ തുടരുന്നതിന് സുല്‍ത്താന്‍ പ്രത്യേക താല്‍പര്യമെടുക്കുന്നുണ്ട്. എണ്ണ കയറ്റുമതിയില്‍ നിന്നുള്ള വരുമാനം മാത്രം ആശ്രയിക്കാതെ വ്യവസായവത്കരണം, ചരക്കുഗതാഗതം, ടൂറിസം മേഖലകളില്‍ നിന്നുള്ള വരുമാന വര്‍ധനവിനും സര്‍ക്കാര്‍ പദ്ധതികള്‍ ആവിഷ്‌കരിക്കുന്നുണ്ട്. കൊവിഡും എണ്ണവിലയിലെ ഇടിവും രാജ്യത്തിന്റെ സാമ്പത്തിക സാഹചര്യങ്ങളില്‍ കാര്യമായ മാറ്റമുണ്ടാക്കിയിട്ടുണ്ടെങ്കിലും സാമ്പത്തിക വൈവിധ്യവത്കരണത്തിനാണ് മുന്‍തൂക്കം നല്‍കുന്നത്. സര്‍ക്കാര്‍ നടപ്പിലാക്കിയ തീരുമാനങ്ങള്‍ വഴി കൊവിഡ് വ്യാപനത്തെ പ്രതിരോധിക്കാന്‍ സാധിച്ചിട്ടുണ്ട്.
എന്നാല്‍ കൊവിഡിന്റെ ആഘാതം മറ്റ് രാജ്യങ്ങളെ പോലെ ഒമാന്റെ സാമ്പത്തിക വളര്‍ച്ചയെയും ബാധിച്ചിട്ടുണ്ട്. റീട്ടെയില്‍, ടൂറിസം, നിര്‍മാണ മേഖലകളെയാണ് കോവിഡ് ഗുരുതരമായി ബാധിച്ചത്. മഹാമാരി ബിസിനസ് മേഖലയിലുണ്ടാക്കിയ ആഘാതം ലഘൂകരിക്കാന്‍ സര്‍ക്കാര്‍ കൈകൊണ്ട നടപടികളെയും ലേഖനത്തില്‍ പ്രശംസിക്കുന്നു. നഗരസഭാ നികുതികള്‍, സര്‍ക്കാര്‍ ഫീസുകള്‍, തുറമുഖ ഫീസ്, കാര്‍ഗോ നിരക്കുകള്‍ തുടങ്ങിയവയില്‍ ഇളവുകള്‍ നല്‍കിയാണ് സര്‍ക്കാര്‍ ബിസിനസ് മേഖലക്ക് താങ്ങായി നിന്നത്. ഒമാന്‍ വെലപ്‌മെന്റ് ബാങ്കിന്റെയും ചെറുകിട-ഇടത്തരം വ്യവസായ വികസന ഫണ്ടിന്റെയും വായ്പാ തവണകളുടെ അടവ് നീട്ടി നല്‍കുകയും ചെയ്തു. ചരക്കുഗതാഗത കേന്ദ്രമായതിനാല്‍ ആഗോള വാണിജ്യത്തിലുണ്ടായ വലിയ കുറവ് ഒമാന്റെ സമ്പദ്ഘടനയെയും ബാധിച്ചിട്ടുണ്ടെന്ന് റിപ്പോര്‍ട്ട് പറയുന്നു.