പുതിയ വസ്ത്രത്തിന്റെ കഴുത്തിറങ്ങിയതിന് പ്രിയക്കെതിരെയും സൈബര്‍ ആക്രമണം

സ്ത്രീകള്‍, പ്രത്യേകിച്ചും യുവ നടിമാര്‍ നേരിടുന്ന പ്രധാന ബുദ്ധിമുട്ടാണ് സൈബര്‍ ആക്രമണം. ഇപ്പോഴിതാ പ്രിയ വാര്യര്‍ക്ക് നേരെയും സൈബര്‍ ആങ്ങളമാര്‍ എത്തിയിരിക്കുകയാണ്. കുറച്ചു ദിവസങ്ങള്‍ക്ക് മുന്നേ പ്രിയ തന്റെ പുതിയ വസ്ത്രം ധരിച്ചുള്ള ഫോട്ടോ ഇന്‍സ്റ്റാഗ്രാമില്‍ പോസ്റ്റ് ചെയ്തിരുന്നു. ആ വസ്ത്രത്തിന്റെ കഴുത്തിറങ്ങി പോയതാണ് സൈബര്‍ ആങ്ങളമാരെ ചൊടിപ്പിച്ചത്. പോസ്റ്റിന് താഴെ മോശം രീതിയിലൂടെയുള്ള കമെന്റുകളാണ് അവര്‍ പ്രിയയ്ക്ക് നല്‍കിയത്. എന്നാല്‍ എല്ലാ തവണയും പോലെ മിണ്ടാതിരിക്കാനോ കണ്ടില്ലെന്നു നടിക്കാനോ പ്രിയ നിന്നില്ല. അവര്‍ക്കുള്ള ചുട്ട മറുപടിയുമായാണ് പ്രിയ ഇന്‍സ്റ്റാ സ്റ്റോറില്‍ വന്നത്.
''എന്റെ പോസ്റ്റിന് താഴെ ചില കമന്റുകളുണ്ടായിരുന്നു. കമന്റുകളുടെ നാലില്‍ ഒന്നുപോലും വായിച്ച് തീര്‍ക്കാന്‍ എനിക്ക് സാധിച്ചിട്ടില്ല. തുടക്കത്തില്‍ ചില കമന്റുകള്‍ വായിച്ചു. എല്ലാവരും ആ കമന്റുകള്‍ കാണേണ്ടതാണ് എന്നു തോന്നിയതുകൊണ്ട് അതിവിടെ പങ്കുവയ്ക്കാന്‍ ഞാന്‍ തീരുമാനിച്ചു. ഒരുപക്ഷെ ആ കമന്റ് ചെയ്തവര്‍ക്ക് നമ്മളെല്ലാവരും കൈയടിക്കേണ്ടതുണ്ട്. അതുകൊണ്ടല്ലേ ഇത്തരം ചെറിയ വിലകുറഞ്ഞ കാര്യങ്ങള്‍ അവര്‍ പോസ്റ്റ് ചെയ്യുന്നത്. ഒരുതരം അംഗീകാരത്തിനോ അഭിനന്ദനത്തിനോ വേണ്ടി.
നമുക്ക് അതവര്‍ക്ക് നല്‍കാം. എന്തായാലും എല്ലാവരോടും കരുണയോടെ പെരുമാറാനാണ് എന്നെ പഠിപ്പിച്ചിരിക്കുന്നത്. ഇവിടെയിപ്പോള്‍ വലിയൊരാളാകാനുള്ള അവസരമാണ് എനിക്ക് ലഭിച്ചിരിക്കുന്നത്. ഇത് എനിക്ക് പുതിയതൊന്നുമല്ല. ഞാന്‍ ദിവസേന ഇത്തരത്തിലുള്ള അപമാനങ്ങളിലൂടെ കടന്നു പോകാറുണ്ട്. ഈ ഭീഷണികള്‍ നിലനില്‍ക്കുമ്പോഴും ഇത്രയും ദൂരം എത്തിയതില്‍ എനിക്ക് എന്നെക്കുറിച്ച് അഭിമാനമുണ്ട്. എല്ലാ സ്ത്രീകളും അങ്ങനെ ആയിരിക്കണം. ഇപ്പോള്‍ ഇത്രമാത്രം. എന്റെ ശൈലിയില്‍ ശ്രദ്ധ ചെലുത്തിയതിന് നന്ദി. #ItsADressNotAYes #RefuseTheAbuse,' പ്രിയ കുറിച്ചു.