16 റഫാൽ വിമാനങ്ങൾ കൂടി എത്തുന്നു

അടുത്ത ഏപ്രിലിനകം 16 റഫാൽ വിമാനങ്ങൾ കൂടി എത്തുന്നു. നവംബർ, ജനുവരി, മാർച്ച് മാസങ്ങളിലായി മൂന്നു വിമാനങ്ങൾ വീതവും ഏപ്രിലിൽ ഏഴു വിമാനവുമാണെത്തുന്നത്. ഏഴ് ഇരട്ടസീറ്റ് വിമാനങ്ങൾ ഫ്രാൻസിൽ വ്യോമസേനാ പൈലറ്റുമാർക്ക് പരിശീലനത്തിനായി ഉപയോഗിക്കുന്നുണ്ട്. ജൂലൈ 29ന് ആദ്യ ഘട്ടമായി അഞ്ചു വിമാനങ്ങളെത്തിയിരുന്നു.

ഇതോടെ, ഏപ്രിലാകുമ്പോൾ 21 ഒറ്റ സീറ്റ് വിമാനങ്ങളും ഏഴ് ഇരട്ടസീറ്റ് വിമാനങ്ങളും ഇന്ത്യയുടെ പക്കലുണ്ടാകും. ഇതിൽ 18 എണ്ണം അംബാലയിലെ ഗോൾഡൻ ആരോസ് സ്ക്വാഡ്രനിലും ശേഷിക്കുന്നവ  പശ്ചിമ ബംഗാളിലെ ഹഷിമാര വ്യോമതാവളത്തിലും വിന്യസിക്കും. നവംബർ അഞ്ചിനാണ് മൂന്ന് വിമാനങ്ങൾ ഫ്രാൻസിലെ ബോർഡിയക്സ്- മെറിഗ്നാക്കിൽ നിന്ന് അംബാലയിലേക്കെത്തുന്നത്.

ആദ്യം വന്ന അഞ്ചു വിമാനങ്ങളും യുഎഇയിലെ ഫ്രഞ്ച് വ്യോമതാവളത്തിൽ ഇറങ്ങിയശേഷമാണ് വന്നതെങ്കിൽ ഇനിയുള്ളവ ആകാശത്ത് ഇന്ധനം നിറച്ച് നേരിട്ട് ഇന്ത്യയിലാകും ഇറങ്ങുക. മുഴുവൻ വിമാനങ്ങളിലും മൈക, മീറ്റിയോർ എന്നീ വ്യോമ- വ്യോമ മിസൈലുകളും സ്കാൽപ്പ് വ്യോമ- ഭൂത മിസൈലുകളും ഘടിപ്പിച്ചിട്ടുണ്ട്. 250 കിലോഗ്രാം ഭാരമുള്ള ബോംബ് ഘടിപ്പിക്കാവുന്ന ഹമ്മർ മിസൈലുകൾ കൂടി റഫാലിൽ ഘടിപ്പിക്കാൻ ഇന്ത്യ നിർദേശിച്ചിട്ടുണ്ട്. ഇതും വൈകാതെ യാഥാർഥ്യമാകും.

കൂടാതെ, റഫാലിന്‍റെ എൻജിൻ നിർമാതാക്കളായ സഫ്രൻ, റഫാൽ കരാർ നാലു വർഷമെത്തുമ്പോൾ ഇതിലുപയോഗിക്കുന്ന സ്നെക്മ എം88 എൻജിനുകൾ ഇന്ത്യയിൽ നിർമിക്കാമെന്ന വാഗ്ദാനവും മുന്നോട്ടുവച്ചിട്ടുണ്ട്.  പോർവിമാന സാങ്കേതിക മേഖലയിൽ ഇന്ത്യയ്ക്ക് വലിയ നേട്ടമാകും ഇതു സമ്മാനിക്കുക. റഫാലിലെ എൻജിനായ എം88 ഇന്ത്യയുടെ പ്രതിരോധ ഗവേഷണ സ്ഥാപനം ഡിആർഡിഒ വികസിപ്പിച്ച ലൈറ്റ് കോംബാറ്റ് എയർക്രാഫ്റ്റ് മാർക്ക് 2ലും (തേജസിന്‍റെ പുതിയ പതിപ്പ്) ഉപയോഗിക്കാനാകും.

തേജസിന്‍റെ ലൈറ്റ് കോംബാറ്റ് എയർക്രാഫ്റ്റ് മാർക്ക് 1എ എന്ന പതിപ്പ് 83 എണ്ണം വാങ്ങാൻ വ്യോമസേന ഡിആർഡിഒയുമായി അന്തിമധാരണയിലേക്കു നീങ്ങുന്നതിനിടെയാണ് എൻജിൻ നിർമാണ രംഗത്ത് ഫ്രാൻസിന്‍റെ സഹായം. നിലവിൽ യുഎസ്, റഷ്യ, ഫ്രാൻസ് എന്നീ രാജ്യങ്ങൾക്കു മാത്രമാണ് പോർവിമാനങ്ങളുടെ എൻജിൻ നിർമിക്കാനുള്ള ശേഷി. റഷ്യൻ നിർമിത ആർഡി 93, ആർഡി 33 എൻജിനുകളാണ് ചൈനയുടെ അത്യാധുനിക പോർവിമാനങ്ങളായ ജെ-31, ജെഎഫ്- 17 എന്നിവയിൽ ഉപയോഗിക്കുന്നത്.