അയല്‍ക്കാരുടെ ചങ്കിടിപ്പ് കൂട്ടി അവന്‍ വരുന്നു!

അത്യാധുനിക അമേരിക്കന്‍ നിര്‍മിത എഫ്-18 സൂപ്പര്‍ ഹോണെറ്റ് വിമാനങ്ങള്‍ സ്വന്തമാക്കാന്‍ ഇന്ത്യ ഒരുങ്ങുന്നതായി റിപ്പോര്‍ട്ട്. ഇതു സംബന്ധിച്ച് ഉന്നതവൃത്തങ്ങളെ ഉദ്ധരിച്ച് എഎന്‍ഐയും യൂറേഷ്യന്‍ ടൈംസ് ഡോട്ട് കോമുമാണ് ഇക്കാര്യം റിപ്പോര്‍ട്ട് ചെയ്തത്.വിമാനവാഹനി കപ്പലുകളില്‍നിന്ന് പറത്താവുന്ന വിമാനങ്ങളാണ് എഫ്-18 സൂപ്പര്‍ ഹോണെറ്റ് വിമാനങ്ങള്‍. രണ്ട് എന്‍ജിനുകളുള്ള ഈ എഫ്-18 വിമാനങ്ങള്‍ക്ക് കരയില്‍നിന്നും വിമാനവാഹിനിക്കപ്പലില്‍നിന്നും ഒരുപോലെ ശത്രുവിനെ ലക്ഷ്യമാക്കി കുതിക്കാന്‍ സാധിക്കും എന്നാണ് റിപ്പോര്‍ട്ടുകള്‍. ഇപ്പോള്‍ പാകിസ്ഥാന്റെ കൈവശമുള്ള ഒറ്റ എന്‍ജിനുള്ള എഫ്-16 അമേരിക്കന്‍ യുദ്ധവിമാനങ്ങള്‍ക്ക് കരയില്‍നിന്നുമാത്രമാണ് പറന്നുയരാനാവുക എന്നാണ് റിപ്പോര്‍ട്ടുകള്‍. ഇന്ത്യ-പസഫിക് മേഖലയില്‍ ചൈനയുടെ മേധാവിത്വം ഒഴിവാക്കാന്‍ ഇന്ത്യന്‍ നാവികസേനയുടെ ശക്തി വര്‍ധിപ്പിക്കുക കൂടി ലക്ഷ്യമിട്ടാണ് അമേരിക്കയുടെ നീക്കം എന്നും റിപ്പോര്‍ട്ടുകളുണ്ട്.വിമാനവാഹിനിക്കപ്പലുകളായ ഐഎന്‍എസ് വിക്രമാദിത്യയിലും ഇപ്പോള്‍ നിര്‍മാണത്തിലുള്ള തദ്ദേശീയ കപ്പലിലും ഉപയോഗിക്കാനായി 57 എഫ്-18 വിമാനങ്ങള്‍ അമേരിക്കന്‍ കമ്പനിയായ ബോയിങ്ങില്‍നിന്നു വാങ്ങാന്‍ മൂന്നുവര്‍ഷംമുമ്പ് ഇന്ത്യ നീക്കം നടത്തിയിരുന്നു. ഇതിനെത്തുടര്‍ന്ന് ബോയിങ് എഫ്-18 സൂപ്പര്‍ ഹോണെറ്റ് പോര്‍വിമാനം നിര്‍മിക്കുന്നതിനായി പൊതുമേഖലാ സ്ഥാപനമായ എച്ച്.എ.എല്ലുമായി 2017 നവംബറില്‍ ചര്‍ച്ചയും നടത്തി. തുടര്‍ന്ന് കഴിഞ്ഞ ദിവസം നടന്ന ചര്‍ച്ചയിലാണ് ഇക്കാര്യത്തില്‍ അന്തിമ തീരുമാനം ഉണ്ടായതെന്നാണ് റിപ്പോര്‍ട്ടുകള്‍.