സ്ത്രി വിരുദ്ധ പരാമര്‍ശവുമായി തിരുവഞ്ചൂര്‍

നഗരസഭ അംഗമായ പൊതുപ്രവര്‍ത്തകയായ വനിതയെ ഭാരമുള്ള സ്ത്രീ എന്നു വിശേഷിപ്പിച്ച് തിരുവഞ്ചൂര്‍ രാധാകൃഷ്ണന്‍ അധിക്ഷേപിച്ചതായി പരാതി. പൂവന്‍തുരുത്തില്‍ മേല്‍പ്പാലം നിര്‍മാണത്തിന്റെ ഉദ്ഘാടന ചടങ്ങിലാണ് തിരുവഞ്ചൂര്‍ രാധാകൃഷ്ണന്‍ വ്യക്തിപരമായി അധിക്ഷേപിച്ചതായി പരാതി ഉയര്‍ന്നിരിക്കുന്നത്.കോടിമത ഈരയില്‍ക്കടവിലെ വികസനം തടയുന്നത് ഭാരം കൂടുതലുള്ള വനിതതയാണ് എന്നാണ് തിരുവഞ്ചൂര്‍ പ്രസ്താവന നടത്തിയത്. ഇതു സംബന്ധിച്ചുള്ള വീഡിയോ വൈറലാക്കി മാറ്റിയിട്ടുണ്ട്.
സിപിഎം കോട്ടയം ഏരിയ കമ്മിറ്റിയുടെ നേതൃത്വത്തില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ കോടിമതയിലെ ഓഫിസിലേയ്ക്കു രാവിലെ 11 ന് മാര്‍ച്ച് നടത്താന്‍ സിപിഎം തീരുമാനിച്ചിട്ടുണ്ട്.പൂവന്‍തുരുത്തില്‍ മേല്‍പ്പാലം നിര്‍മ്മാണം വൈകുന്നതിനെതിരെ ബുധനാഴ്ച വൈകിട്ട് കോണ്‍ഗ്രസ് നേതൃത്വത്തില്‍ പൂവന്‍തുരുത്തില്‍ സമരം നടത്തിയിരുന്നു. ഈ സമരത്തിന്റെ ഉദ്ഘാടന പ്രസംഗത്തിന് ഇടയാണ് തിരുവഞ്ചൂര്‍ രാധാകൃഷ്ണന്‍ വ്യക്തിപരമായ അധിക്ഷേപം നടത്തിയതായുള്ള പ്രസംഗം ഉണ്ടായത്. പനച്ചിക്കാട് സരസ്വതി ക്ഷേത്രത്തിലെ ഊട്ടുപുര സന്ദര്‍ശിച്ച വിഷയത്തില്‍ സിപി.എമ്മും തിരുവഞ്ചൂര്‍ രാധാകൃഷ്ണനും തമ്മില്‍ നേരിട്ട് ഏറ്റുമുട്ടല്‍ നടക്കുകയാണ്. ഇതിനിടെയാണ് ഇപ്പോള്‍ സ്ത്രീ വിരുദ്ധ പരാമര്‍ശം തിരുവഞ്ചൂര്‍ നടത്തിയെന്ന ആരോപണം ഉയര്‍ന്നിരിക്കുന്നത്.