‘കേട്ടത് ശ്രീരാമ സ്തുതികള്‍’- കശ്മീര്‍ വിഷയത്തില്‍ പാകിസ്ഥാന്‍ സംഘടിപ്പിച്ച ഒണ്‍ലൈന്‍ ചര്‍ച്ച പൊളിച്ചടുക്കി ഹാക്കര്‍മാര്‍

കശ്മീര്‍ വിഷയവുമായി ബന്ധപ്പെട്ട് പാകിസ്ഥാന്‍ സംഘടിപ്പിച്ച ഓണ്‍ലൈന്‍ ചര്‍ച്ച ഹാക്ക് ചെയ്തു. ഹിന്ദു ഭക്തി ഗാനങ്ങള്‍ കേള്‍പ്പിച്ചാണ് ഹാക്കര്‍മാര്‍ ചര്‍ച്ച ഹാക്ക് ചെയ്തത്. വീഡിയോ കോണ്‍ഫറന്‍സ് ഫേസ്ബുക്ക് വഴി ലൈവ് സ്ട്രീം ചെയ്യുന്നതിനിടെയാണ് സംഭവം. വിവിധ രാജ്യങ്ങളില്‍ നിന്നുള്ള വിദഗ്ധര്‍ ചര്‍ച്ചയില്‍ പങ്കെടുത്തിരുന്നു. 'ഇന്ത്യ കശ്മീര്‍ കൈയടക്കിയ 72 വര്‍ഷങ്ങള്‍' എന്നതായിരുന്നു ചര്‍ച്ചയുടെ വിഷയം. ഇന്ത്യാവിരുദ്ധമായ ഈ ചര്‍ച്ച ഹാക്ക് ചെയ്യുകയും ശ്രീരാമ, ഹനുമാന്‍ സ്തുതി ഗീതങ്ങള്‍ കേള്‍പ്പിക്കുകയുമായിരുന്നു. ചര്‍ച്ചയ്ക്കിടെ പല തവണയായാണ് ഹാക്കര്‍മാര്‍ തടസം സൃഷ്ടിച്ചത്. പാട്ട് കേള്‍ക്കാന്‍ തുടങ്ങിയ ഉടനെ. 'ഇത് ഞങ്ങള്‍ പ്രതീക്ഷിച്ചതാണ്' എന്നായിരുന്നു പ്രതിനിധികളില്‍ ഒരാളുടെ പ്രതികരണം. ഹാക്കര്‍മാരുടെ മൈക്ക് മ്യൂട്ട് ചെയ്യാന്‍ മറ്റൊരു പ്രതിനിധി ആവശ്യപ്പെടുന്നുണ്ടായിരുന്നുവെങ്കിലും ഹാക്കര്‍മാര്‍ ചര്‍ച്ചയ്ക്ക് തടസം സൃഷ്ടിക്കുന്നത് തുടരുകയായിരുന്നു. ഈ സംഭവത്തിന്റെ വീഡിയോകള്‍ സോഷ്യല്‍ മീഡിയയില്‍ വ്യപകമായാണ് പ്രചരിക്കുന്നത്.