എന്‍ ഡി എ മുന്നില്‍ സാധ്യത ഇപ്പോഴും തൂക്കുസഭയ്ക്ക്

ബിഹാര്‍ തെരഞ്ഞെടുപ്പു ഫലം പുറത്തുവരുമ്പോള്‍ ബിജെപി നേതൃത്വം കൊടുക്കുന്ന എന്‍ഡിഎ സഖ്യം നേരിയ സീറ്റുകള്‍ക്ക് മുന്നില്‍ നില്‍ക്കുകയാണ്. ്. വോട്ടെണ്ണലിന്റെ തുടക്കത്തില്‍ മുന്നില്‍ നിന്ന തേജസ്വി യാദവിന്റെ ആര്‍ജെഡി സഖ്യം ഇപ്പോള്‍ പിന്നോട്ടു പോയി.
ഇപ്പോഴത്തെ നിലയില്‍ 126 സീറ്റുകളില്‍ എന്‍ഡിഎ സഖ്യം മുന്നില്‍ നില്‍ക്കുമ്പോള്‍ 104 സീറ്റുകളിലേക്ക് ആര്‍ജെഡി സഖ്യം ചുരുങ്ങി.19 സീറ്റില്‍ ഇടതു പക്ഷം മുന്നിലുണ്ട്.
അതേസമയം, മഹാസഖ്യത്തില്‍ ആര്‍.ജെ.ഡി മുന്നിട്ട് നില്‍ക്കുകയാണ്. കോണ്‍ഗ്രസിന് അത്ര മികച്ച പ്രകടനം കാഴ്ചവെക്കാന്‍ സാധിച്ചിട്ടില്ല എന്നുതന്നെയാണ്. 70 സീറ്റുകളില്‍ മത്സരിച്ച കോണ്‍ഗ്രസിന് നിലവില്‍ 23 സീറ്റുകളില്‍ മാത്രമാണ് മുന്നിട്ട് നില്‍ക്കാന്‍ സാധിച്ചിട്ടുള്ളത്.

തിരഞ്ഞെടുപ്പ് കമ്മീഷന്റെ ഔദ്യോഗിക കണക്കുകള്‍ പ്രകാരം 125 സീറ്റുകളിലെ ഫലമാണ് നിലവില്‍ ലഭ്യമായത്. ഇതില്‍ 56 സീറ്റുകളിലാണ് മഹാസഖ്യം മുന്നേറുന്നത്. ആര്‍ജെഡി 36, കോണ്‍ഗ്രസ് 13, സിപിഐ (എം.എല്‍) 6, സിപിഎം ഒന്ന് എന്നിങ്ങനെയാണ് ലീഡ് ചെയ്യുന്നത്. എന്‍ഡിഎ 63 സീറ്റുകളില്‍ മുന്നേറുന്നുണ്ട്. ബിജെപി 33, ജെഡിയു 25 , വിഐപി 5 എന്നിങ്ങനെയാണ് ലീഡ് ചെയ്യുന്നത്.

അസദുദ്ദീന്‍ ഒവൈസിയുടെ ആള്‍ ഇന്ത്യ മജ്‌ലിസെ ഇത്തിഹാദുല്‍ മുസ്ലിമീന്‍ ഒരു സീറ്റിലും ബിഎസ്പി രണ്ടിടത്തും ചിരാഗ് പാസ്വാന്റെ എല്‍ജെപി മൂന്നിടത്തും ലീഡ് ചെയ്യുന്നുണ്ട്.

ആര്‍.ജെ.ഡിക്ക് കൂടുതല്‍ സീറ്റുകളില്‍ മത്സരിക്കാന്‍ സാധിച്ചിരുന്നെങ്കില്‍ മഹാസഖ്യത്തിന് വിജയ സാധ്യത കൂടുമായിരുന്നെന്ന വിലയിരുത്തലുകളാണ് വന്നുകൊണ്ടിരിക്കുന്നത്.
കേവല ഭൂരിപക്ഷത്തിന് വേണ്ട 122 സീറ്റ് എന്ന മാന്ത്രിക സംഖ്യ ആര് നേടും എന്ന് ഉറപ്പ് പറയാനാകാത്ത നിലയിലാണ് ഇരു മുന്നണികളും മുന്നേറുന്നത്. ഇപ്പോഴത്തെ നിലയില്‍ ബിജെപിക്ക് എത്തിപ്പിടിക്കാവുന്ന നിലയിലേക്കാണ് കാര്യങ്ങളുടെ പോക്ക്.

ആര്‍ക്കും ഭൂരിപക്ഷമില്ലാത്ത സഭയില്‍ ചിരാഗ് പാസ്വാന്‍ നിര്‍ണായകമാകും. ഒരുപക്ഷേ അദ്ദേഹം കിങ്‌മേക്കറാവുകയാണെങ്കില്‍ ആരു ഭരിക്കും എന്നതു അവസാന മണിക്കൂറുകളില്‍ മാത്രമാണ് അറിയാന്‍ പറ്റുക.