രാജ്യത്തെ കൊവിഡ് കേസുകൾ 87.73 ലക്ഷത്തിലേറെയായി

രാജ്യത്തെ കൊവിഡ് കേസുകൾ 87.73 ലക്ഷത്തിലേറെയായി. അവസാന 24 മണിക്കൂറിൽ 44,684 പേർക്കാണു രോഗം സ്ഥിരീകരിച്ചതെന്ന് കേന്ദ്ര ആരോഗ്യ മന്ത്രാലയം ഇന്നു രാവിലെ വ്യക്തമാക്കി. 81.63 ലക്ഷത്തിലേറെ പേർ ഇതുവരെ രോഗമുക്തരായി. റിക്കവറി നിരക്ക് 93.04 ശതമാനമായി ഉയർന്നിട്ടുണ്ട്. 520 പേർ കൂടി മരിച്ചതോടെ ഇതുവരെയുള്ള മരണസംഖ്യ 1,29,188 ആയി. മരണനിരക്ക് 1.47 ശതമാനമാണ്.

രാജ്യത്ത് ഇപ്പോൾ കൊവിഡ് ചികിത്സയിലുള്ളത് 4,80,719 പേരാണ്. മൊത്തം കേസ് ലോഡിന്‍റെ 5.48 ശതമാനമാണിത്. 9.29 ലക്ഷത്തിലേറെ സാംപിളുകൾ വെള്ളിയാഴ്ച രാജ്യത്തു പരിശോധിച്ചെന്ന് ഐസിഎംആർ വ്യക്തമാക്കി. 

ഉത്സവ സീസണിൽ രോഗവ്യാപനം അതിരൂക്ഷമായ ഡൽഹിയിൽ പുതുതായി വൈറസ് സ്ഥിരീകരിച്ചത് 7,802 പേർക്കാണ്. 91 പേർ കൂടി 24 മണിക്കൂറിനിടെ രാജ്യതലസ്ഥാനത്തു മരിച്ചു. ഡൽഹിയിലെ ഇതുവരെയുള്ള മരണസംഖ്യ 7,423 ആയിട്ടുണ്ട്. 13.80 ശതമാനം ടെസ്റ്റ് പോസിറ്റിവിറ്റി നിരക്കും ഡൽഹിയിലുണ്ട്. ബുധനാഴ്ച 8,593 കേസുകൾ സ്ഥിരീകരിച്ച് പ്രതിദിന വർധനയിലെ റെക്കോഡ് സൃഷ്ടിച്ചിരുന്നു ഡൽഹി. 

കേരളത്തിൽ 5,804 പുതിയ കേസുകളാണ് ഇന്നലെ കണ്ടെത്തിയത്. 26 പേർ കൂടി മരിച്ചു. മഹാരാഷ്ട്രയിൽ പുതുതായി രോഗം സ്ഥിരീകരിച്ചത് 4,132 പേർക്ക്. 127 പേരുടെ മരണം കൂടി ഇന്നലെ കണക്കുകളിൽ രേഖപ്പെടുത്തി. 3,835 പേർക്കാണ് ഇന്നലെ പശ്ചിമ ബംഗാളിൽ രോഗം സ്ഥിരീകരിച്ചത്. 51 പേർ ഒരു ദിവസത്തിനിടെ മരിച്ചിട്ടുണ്ട്.