കളിയല്ല കണക്ക് ഉണ്ടാകണം

തദ്ദേശ തിരഞ്ഞെടുപ്പിൽ സ്ഥാനാർഥികളുടെ ചെലവു പരിശോധിക്കാൻ നിരീക്ഷകരുണ്ട് . നിരീക്ഷകരുടെ നിയമന നടപടി സംസ്ഥാന തിരഞ്ഞെടുപ്പ് കമ്മിഷൻ ആരംഭിച്ചു. ദൈനംദിന കണക്കുകൾ പരിശോധിക്കുകയും ചെലവുകൾ അതതിടങ്ങളിൽ വിലയിരുത്തുകയുമാണു ചെയ്യുക.

സ്ഥാനാർഥികൾക്കു വേണ്ടി ഗുണകാംകക്ഷികളോ രാഷ്ടീയപാർട്ടികളോ ചെലവാക്കുന്ന തുകയും വരണാധികാരിയെ അറിയിക്കണമെന്നും കമ്മിഷൻ നിർദേശിച്ചിട്ടുണ്ട്. ചെലവു ചെയ്ത ആളോ രാഷ്ട്രീയപാർട്ടിയോ എന്തിനു വേണ്ടി എന്നു ചെലവാക്കി എന്നതു സംബന്ധിച്ച വിവരങ്ങൾ സ്ഥാനാർഥി സൂക്ഷിക്കണം. തർക്കമുണ്ടായാൽ ഇതു ഹാജരാക്കണം. അല്ലെങ്കിൽ അതും സ്ഥാനാർഥിയുടെ ചെലവായി കണക്കാക്കും.

സ്ഥാനാർഥിയോ ഏജന്റോ സ്ഥാനാർഥിക്കു വേണ്ടി മറ്റാരെങ്കിലുമോ നാമനിർദേശപത്രിക സമർപ്പണം മുതൽ ഫലപ്രഖ്യാപനം വരെയുള്ള തീയതികളിൽ ചെലവാക്കുന്ന തുകയാണു കണക്കാക്കുക. ബാനർ, ചുവരെഴുത്ത്, അച്ചടി, നോട്ടിസ്, ബാനർ, കമാനം, യാത്ര, തപാൽ, ദൃശ്യ ശ്രവ്യമാധ്യമങ്ങൾ, ഉച്ചഭാഷിണി, യോഗം, വാഹനവാടക തുടങ്ങിയവ ചെലവിൽ ഉൾപ്പെടും. എല്ലാ ചെലവുകൾക്കും ബിൽ അല്ലെങ്കിൽ വൗച്ചറിന്റെ പകർപ്പു നൽകണം. തിരഞ്ഞെടുപ്പ് ഫലം പ്രഖ്യാപിക്കുന്ന തീയതി മുതൽ 30 ദിവസത്തിനകം കണക്കു സമർപ്പിക്കണം. സോഷ്യമീഡിയ ചെലവുകൾ എങ്ങനെ കണക്കാക്കും എന്നത് സംബന്ധിച്ച് സ്ഥാനാർത്ഥികൾക്ക് ആശങ്കയുണ്ട്.

ഗ്രാമപ്പഞ്ചായത്തിലെ സ്ഥാനാർഥികൾ ബ്ലോക്ക് പഞ്ചായത്ത് സെക്രട്ടറിക്കും ബ്ലോക്കിലെ സ്ഥാനാർഥികൾ ജില്ലാ പഞ്ചായത്ത് സെക്രട്ടറിക്കും. ജില്ലാ പഞ്ചായത്ത്, മുനിസിപ്പാലിറ്റി, കോർപറേഷൻ എന്നിവയിലെ സ്ഥാനാർഥികൾ കലക്ടർക്കുമാണു കണക്കു നൽകേണ്ടത്. ഇപ്രകാരം സമർപ്പിക്കുന്ന കണക്കുകൾ പരിശോധിക്കാൻ 5 രൂപ ഫീസ് നൽകുന്ന ആർക്കും അർഹതയുണ്ടാകും. 25 രൂപ ഫീസ് നൽകുന്നവർക്ക് കണക്കിന്റെ ഭാഗികമായോ പൂർണമായോ പകർപ്പും നൽകും