64 മത്തെ വയസില്‍ രാജന് മകള്‍ക്കൊപ്പം കന്നി വോട്ട്

പ്രവാസ ജീവിതത്തിനിടയില്‍ കിട്ടാക്കനിയായി മാറിയ കന്നിവോട്ട് മകള്‍ക്കൊപ്പം 64 മത്തെ വയസില്‍ രേഖപ്പെടുത്താനൊരുങ്ങുകയാണ് രാജന്‍.ചെക്യാട് ഉമ്മത്തൂര്‍ സ്വദേശി തിരുമ്പല്‍ രാജന്‍ ആണ് ഈ തദ്ദേശ സ്വയംഭരണ തെരഞ്ഞെടുപ്പില്‍ ആദ്യത്തെ സമ്മതിദാനവകാശം വിനിയോഗിക്കാന്‍ ഒരുങ്ങുന്നത്.20 മത്തെ വയസില്‍ 1977 ല്‍ ജീവിത പ്രാരാബ്ദങ്ങളുമായി മസ്‌ക്കത്തിലെത്തിയ രാജന് വോട്ടര്‍ പട്ടികയില്‍ പേര് ഉണ്ടായിരുന്നിട്ടും വിദേശത്തായതിനാല്‍ വോട്ട് രേഖപ്പെടുത്താന്‍ കഴിഞ്ഞിരുന്നില്ല. നാട്ടിലായിരുന്നപ്പോള്‍ പ്രവാസി എന്ന് കാണിച്ച് വോട്ടര്‍ പട്ടികയില്‍ നിന്ന് വെട്ടിനിരത്തലും സംഭവിച്ചപ്പോള്‍ ആദ്യ വോട്ടിന് 64 വയസ് വരെ കാത്തിരിക്കേണ്ടിയും വന്നു.2018 ല്‍ പ്രവാസ ജീവിതം അവസാനിപ്പിച്ച് സ്ഥിരതാമസക്കാരനായതോടെയാണ് വോട്ടിംഗിന് അവസരം ലഭിച്ചത്.കഴിഞ്ഞ ദിവസം ചെക്യാട് പഞ്ചായത്തിലെത്തി അന്വേഷിച്ചപ്പോഴാണ് ഇത്തവണ വോട്ട് ഉള്ളതായി അറിഞ്ഞതും വോട്ട് രേഖപ്പെടുത്തണമെന്ന ഉദ്യോഗസ്ഥരുടെ നിര്‍ദ്ദേശം ലഭിച്ചതെന്നും രാജന്‍ പറഞ്ഞു. നാടിന്റെ വികസന പ്രവര്‍ത്തനങ്ങള്‍ക്ക് മുന്‍തൂക്കം നല്‍കുന്ന പാര്‍ട്ടിക്കാണ് തന്റെ ആദ്യ വോട്ടെന്നും രാജന്‍ പറയുന്നു. മകളും എം ബി എ വിദ്യാര്‍ത്ഥിനിയുമായ അശ്വനിക്കും ഇത്തവണ ആദ്യ വോട്ടാണ്. അച്ഛനൊനൊപ്പം ആദ്യ വോട്ട് ചെയ്യാമെന്ന സന്തോഷത്തിലാണ് അശ്വതിയും.ചെക്യാട് പഞ്ചായത്തിലെ 14 വാര്‍ഡിലാണ് ഇരുവര്‍ക്കും വോട്ട്. പ്രവാസ ജീവിതം അവസാനിപ്പിച്ച രാജന്‍ തൂണേരി പഞ്ചായത്ത് ഓഫീസ് പരിസരത്ത് ഫാന്‍സി കട നടത്തുകയാണ്.