പുതിയ കേസുകൾ 45,000ൽ താഴെ

രാജ്യത്തെ കൊവിഡ് കേസുകൾ 91 ലക്ഷം കടന്നു. ഇന്നു രാവിലെ എട്ടിന് അവസാനിച്ച 24 മണിക്കൂറിൽ 44,059 പുതിയ കേസുകളാണു സ്ഥിരീകരിച്ചത്. ഇതോടെ മൊത്തം കേസുകൾ 91,39,865 ആയിട്ടുണ്ട്. രോഗമുക്തർ 85.62 ലക്ഷത്തിലേറെയായി. ആക്റ്റിവ് കേസുകൾ 4,43,486. തുടർച്ചയായി പതിമൂന്നാം ദിവസമാണ് ചികിത്സയിലുള്ളവരുടെ എണ്ണം അഞ്ചു ലക്ഷത്തിൽ താഴെ നിൽക്കുന്നത്.

അവസാന 24 മണിക്കൂറിൽ 511 പേർ കൂടി മരിച്ചു. ഇതോടെ രാജ്യത്തെ കൊവിഡ് മരണസംഖ്യ 1,33,738 ആയിട്ടുണ്ട്. 1.46 ശതമാനമാണ് മരണനിരക്ക്. ദേശീയ റിക്കവറി നിരക്ക് 93.68 ശതമാനം. ഈ മാസം ഇരുപതിനാണ് മൊത്തം കേസുകൾ 90 ലക്ഷം കടന്നത്. ഞായറാഴ്ച 8.49 ലക്ഷത്തിലേറെ സാംപിളുകൾ രാജ്യത്തു പരിശോധിച്ചെന്ന് ഐസിഎംആർ.

അവസാന ദിവസം മരണസംഖ്യ ഏറ്റവും കൂടുതലുള്ള സംസ്ഥാനം ഡൽഹിയാണ്. 121 പേർ ഒരു ദിവസത്തിനിടെ രാജ്യതലസ്ഥാനത്തു മരിച്ചു. മഹാരാഷ്ട്രയിൽ 50, പശ്ചിമ ബംഗാളിൽ 49, യുപിയിൽ 35, കേരളത്തിൽ 27, ഹരിയാനയിൽ 25 പേർ വീതമാണ് 24 മണിക്കൂറിനിടെ മരിച്ചത്. മഹാരാഷ്ട്രയിലെ മൊത്തം മരണം 46,623 ആയിട്ടുണ്ട്. കർണാടകയിൽ 11,654, തമിഴ്നാട്ടിൽ 11,605, ഡൽഹിയിൽ 8,391, പശ്ചിമ ബംഗാളിൽ 8,025, യുപിയിൽ 7,559, ആന്ധ്രയിൽ 6,938 പേർ വീതം ഇതുവരെ കൊവിഡ് ബാധിച്ചു മരിച്ചിട്ടുണ്ട്.