കർഷക പ്രക്ഷോഭം അവഗണിക്കുന്നത് തീക്കളി : ഉമ്മൻ ചാണ്ടി

തിരുവനന്തപുരം : കനത്ത മഞ്ഞിലും തണുപ്പിലും രാജ്യത്തെ കർഷകർ ദിവസങ്ങളായി നടത്തി വരുന്ന പ്രക്ഷോഭം കണ്ടില്ലെന്നു നടക്കുന്ന മോദി ഭരണകൂടം തീക്കളിയാണു നടത്തുന്നതെന്ന് കോൺഗ്രസ് പ്രവർത്തക സമിതിയംഗം ഉമ്മൻ ചാണ്ടി.

പതിനായിരക്കണക്കിനു കർഷകരാണു ഡൽഹിയുടെ പ്രാന്തപ്രദേശങ്ങളിൽ തമ്പടിച്ചിരിക്കുന്നത്. പഞ്ചാബ്, ഹരിയാന എന്നിവിടങ്ങളിൽ നിന്നുള്ള കർഷകർക്കു പുറമേ മറ്റു സംസ്ഥാനങ്ങളിൽ നിന്നുള്ളവരും എത്തുന്നതോടെ ഡൽഹി ചലോ മാർച്ച് കർഷക സാഗരമാകും. 6 മാസം വരെ പ്രക്ഷോഭം നയിക്കാനുള്ള കരുത്തുമായാണ് കർഷകർ ഡൽഹിയിലുള്ളതെന്നും ഉമ്മൻ ചാണ്ടി പറഞ്ഞു.

കർഷകരുടെ രക്ഷയ്ക്കു വേണ്ടിയാണു കേന്ദ്രം കാർഷിക നിയമം കൊണ്ടുവന്നതെന്നു പ്രധാനമന്ത്രി ആവർത്തിക്കുന്നു. അതു കർഷകർക്കു ബോധ്യപ്പെടണം, അല്ലെങ്കിൽ ചർച്ചയിലൂടെ അവരെ ബോധ്യപ്പെടുത്താൻ ശ്രമിക്കണം.

ജയ് ജവാൻ ജയ് കിസാൻ എന്നതു ലാൽ ബഹദൂർ ശാസ്ത്രിയിലൂടെ ഇന്ത്യ വിളിച്ച മുദ്രാവാക്യമാണ്. എന്നാൽ കർഷക വിരോധമാണ് ഈ സർക്കാരിന്റെ മുഖമുദ്രയെന്നും ഉമ്മൻ ചാണ്ടി പറഞ്ഞു.