ശിവശങ്കര്‍, സ്വപ്ന, സരിത്ത് എന്നിവരെ കൂടുതല്‍ ദിവസം കസ്റ്റഡിയില്‍ വാങ്ങുമെന്ന് കസ്റ്റംസ്

നയതന്ത്ര ചാനലിലൂടെ സ്വര്‍ണ്ണം കടത്തിയ കേസിലെ പ്രതികളെ ഏഴുദിവസം കൂടി കസ്റ്റഡിയില്‍ ആവശ്യപ്പെടുമെന്ന് കസ്റ്റംസ്. മുഖ്യമന്ത്രിയുടെ മുന്‍പ്രിന്‍സിപ്പല്‍ സെക്രട്ടറി എം ശിവശങ്കര്‍, മറ്റ് പ്രതികളായ സ്വപ്ന സുരേഷ്, സരിത്ത് എന്നിവരെ ഏഴുദിവസം കൂടി കസ്റ്റഡിയില്‍ ആവശ്യപ്പെടാനാണ് കസ്റ്റംസ് നീക്കം നടത്തുന്നത്. പ്രതികളില്‍ നിന്ന് കൂടുതല്‍ വിവരങ്ങള്‍ ലഭിക്കേണ്ടതുണ്ടെന്നാണ് കസ്റ്റംസ് ഇന്ന് കോടതിയെ ധരിപ്പിക്കാന്‍ പോകുന്നത്.ഡോളര്‍ക്കടത്ത് കേസില്‍ ശിവശങ്കറിന്റെ അഞ്ച് ദിവസത്തെ കസ്റ്റഡി കാലാവധിക്ക് ശേഷമാണ് ഇന്ന് കോടതിയില്‍ ഹാജരാക്കുന്നത്.
കസ്റ്റഡിയില്‍ വാങ്ങിയതിന് ശേഷം സ്വപ്നയേയും സരിത്തിനേയും ശിവശങ്കറിനൊപ്പം ഇരുത്തി കസ്റ്റംസ് ചോദ്യം ചെയ്തിരുന്നു. തുടര്‍ന്ന് സ്വപ്നയുടെ മൊഴിയുടെ അടിസ്ഥാനത്തില്‍ ശിവശങ്കറിനെ പ്രതി ചേര്‍ക്കുമെന്ന റിപ്പോര്‍ട്ടുകള്‍ പുറത്ത് വന്നിരുന്നു. ശിവശങ്കറിനോടൊപ്പം നാലുതവണ യാത്രചെയ്തപ്പോഴും ഡോളര്‍ കടത്തിയിട്ടുണ്ടെന്നാണ് സ്വപ്ന കസ്റ്റംസിന് നല്‍കിയിരിക്കുന്ന മൊഴി. ഡോളര്‍ കടത്തിയത് ശിവശങ്കറിന് അറിയാമായിരുന്നു എന്നുപറഞ്ഞ സ്വപ്ന, പണം വിദേശത്തു നിക്ഷേപിക്കാന്‍ ആണെന്ന് ശിവശങ്കറിനോട് പറഞ്ഞതായും കസ്റ്റംസിന് നല്‍കിയ മൊഴിയില്‍ പറഞ്ഞു. ഡോളര്‍ക്കടത്ത് കേസില്‍ ശിവശങ്കറിനെ അഞ്ചാംപ്രതി ആക്കാനാണ് സാധ്യത.