വിവാഹ അഭ്യര്‍ത്ഥന നിരസിച്ചു; പെണ്‍കുട്ടിയെ കഴുത്തറുത്ത് കൊന്ന യുവാവ് ആത്മഹത്യയ്ക്ക് ശ്രമിച്ചു

വിശാഖപട്ടണം: വിവാഹ അഭ്യര്‍ത്ഥന നിരസിച്ചതിന്റെ പേരില്‍ പെണ്‍കുട്ടിക്ക് നേരെ യുവാവിന്റെ ആക്രമണം. ഇരുപതുകാരിയായ പ്രിയങ്ക എന്ന പെണ്‍കുട്ടിയെ അയല്‍വാസിയായ ശ്രീകാന്ത്(20) കഴുത്തറുക്കുകയായിരുന്നു. മാസങ്ങള്‍ക്ക് മുമ്പ് ശ്രീകാന്ത് പ്രിയങ്കയോട് വിവാഹ അഭ്യര്‍ത്ഥന നടത്തിയിരുന്നു.

വിശാഖപട്ടണത്താണ് സംഭവം. ആറ് മാസം മുമ്പാണ് ശ്രീകാന്ത് പിതാവിനൊപ്പം പ്രിയങ്കയുടെ വീട്ടിലെത്തി വിവാഹ അഭ്യര്‍ത്ഥന നടത്തിയത്. എന്നാല്‍ ആവശ്യം പ്രിയങ്ക നിരസിച്ചിരുന്നു. തുടര്‍ന്ന് കഴിഞ്ഞ ബുധനാഴ്ച്ചയാണ് ശ്രീകാന്ത് പ്രിയങ്കയുടെ വീട്ടിലെത്തി ആക്രമിച്ചത്.

പെണ്‍കുട്ടിയുടെ വീട്ടില്‍ അതിക്രമിച്ചു കയറിയ ശ്രീകാന്ത് മുറിയില്‍ കയറി കഴുത്തില്‍ മൂര്‍ച്ചയേറിയ ആയുധം ഉപയോഗിച്ച് ആക്രമിക്കുകയായിരുന്നു. മുറി പുറത്ത് നിന്ന് പൂട്ടിയ നിലയിലായിരുന്നു.

രാവിലെ 8.45 ഓടെയായിരുന്നു സംഭവം. മുറി പുറത്തു നിന്ന് പൂട്ടിയിരിക്കുന്നതു കണ്ട സഹോദരന്‍ മുറി തുറന്നപ്പോഴാണ് അകത്ത് രക്തം വാര്‍ന്ന നിലയില്‍ പ്രിയങ്കയെ കണ്ടത്. ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

പ്രിയങ്കയെ ആക്രമിച്ച ശേഷം ശ്രീകാന്തും സ്വയം ജീവനെടുക്കാന്‍ ശ്രമിച്ചു. ശ്രീകാന്തിന്റെ അഭ്യര്‍ത്ഥന നിരസിച്ച പെണ്‍കുട്ടി മാതാപിതാക്കള്‍ കണ്ടെത്തിയ മറ്റൊരാളെ വിവാഹം ചെയ്യാനുള്ള തീരുമാനത്തിലായിരുന്നുവെന്ന് സഹോദരി പൊലീസിന് മൊഴി നല്‍കി.സംഭവത്തില്‍ ഐപിസി വകുപ്പുകളായ 307,354,309,452 പ്രകാരം പൊലീസ് കേസെടുത്തു.