കർഷക സമരത്തിന് പിന്തുണയുമായി ബോളിവുഡ് താരങ്ങളും : ഇന്ത്യയുടെ ‘ഭക്ഷ്യ‌സേന’യെന്ന് പ്രിയങ്കയുടെ വിശേഷണം

12 ദിനരാത്രങ്ങൾ നീണ്ട സമരത്തിൽ കർഷകർക്ക് പിന്തുണയുമായി ബോളിവുഡ് താരങ്ങളായ പ്രിയങ്ക ചോപ്രയും സോനം കപൂറും രംഗത്ത്. ഇന്ത്യയുടെ ‘ഭക്ഷ്യ‌സേന’ എന്നാണ് പ്രിയങ്ക ചോപ്ര കര്‍ഷകരെ വിശേഷിപ്പിച്ചത്.

‘കർഷകർ ഇന്ത്യയുടെ ഭക്ഷ്യസേനയാണ്. അവരുടെ ആശങ്കകൾ പരിഹരിക്കപ്പെടണം. അവരുടെ പ്രതീക്ഷകൾ നിറവേറ്റേണ്ടതുണ്ട്. ഒരു ജനാധിപത്യ രാജ്യത്ത് ഈ പ്രതിസന്ധികൾ പരിഹരിക്കപ്പെടുമെന്ന് ഉറപ്പാക്കണം’– പ്രിയങ്ക ചോപ്ര ട്വീറ്റ് ചെയ്തു.

‘കർഷകർ മനുഷ്യ സംസ്കാരത്തിന്റെ തന്നെ അടിത്തറ’ ആണെന്നാണ് ഡാനിയേൽ വെബ്സ്റ്ററിനെ ഉദ്ധരിച്ചുകൊണ്ട് സോനം കപൂർ സമൂഹമാധ്യമത്തിൽ കു‌റിച്ചത്. സമരവേദിയിൽ നിന്നുള്ള ചിത്രങ്ങളും സോനം പോസ്റ്റ് ചെയ്തു. സോനം കപൂറിന്റെ ഭർത്താവും വ്യവസായിയുമായ ആനന്ദ് അഹൂജയും കർഷകർക്ക് ഐക്യദാർഢ്യം പ്രഖ്യാപിച്ചു.

നിരവധി ബോളിവുഡ് താരങ്ങൾ കർഷകർക്ക് പിന്തുണയുമായി രംഗത്തെത്തിയിട്ടുണ്ട്. കർഷകർക്ക് തണുപ്പിനെ ചെറുക്കാൻ കമ്പിളി പുതപ്പ് വാങ്ങാനായി ഗായകന്‍ ദില്‍ജിത് ദോസാന്‍ഝ് ഒരു കോടി രൂപ നൽകിയിരുന്നു. റിതേഷ് ദേശ്മുഖ്, ഗൗഹർ ഖാൻ, ചിത്രാംഗദ സിങ് തുടങ്ങിയവരും കര്‍ഷകർക്ക് പിന്തുണയറിയിച്ച് രംഗത്തെത്തിയിട്ടുണ്ട്.