ഭാരത് ബന്ദിനിടെ ഇടത് നേതാക്കൾ കൂട്ടത്തോടെ അറസ്റ്റിൽ : പ്രതിപക്ഷനേതാക്കൾ നാളെ രാഷ്ട്രപതിയെ കാണും

ദില്ലി: കേന്ദ്രസർക്കാരിന്റെ കർഷക നിയമത്തിനെതിരായ കർഷക സംഘടകളുടെ ഭാരത് ബന്ദിനിടെ ഇടത് നേതാക്കൾ കൂട്ടത്തോടെ അറസ്റ്റിൽ. സമരത്തിൽ മുന്നിലുണ്ടായിരുന്ന സിപിഎം നേതാവ് കെ കെ രാഗേഷ് എംപി , കിസാൻ സഭ അഖിലേന്ത്യാ നേതാവ് പി കൃഷ്ണപ്രസാദ് എന്നിവരെ ബിലാസ് പൂരിൽ നിന്നും അറസ്റ്റ് ചെയ്തു.യു പി പോലീസ് ആണ് അറസ്റ്റ് ചെയ്തത്.

കർഷക സമരത്തിന് പിന്തുണ പ്രഖ്യാപിച്ച ഭീം ആർമി നേതാവ് ചന്ദ്രശേഖർ ആസാദിനെയും യുപി പൊലീസ് കസ്റ്റഡിയിലെടുത്തു. യുപിയിലെ വീട്ടിൽ നിന്നും സമരത്തിൽ പങ്കെടുക്കാനിറങ്ങവേയാണ് ആസാദിന്റെ അറസ്റ്റ്.

സിപിഎം പിബി അംഗം സുഭാഷിണി അലിയുടെ യുപി കാൺപൂരിലെ വസതിക്ക് മുന്നിൽ നിലവിൽ വൻ പൊലീസ് സന്നാഹമാണുള്ളത്.

ബന്ദിന് ഐക്യദാർഡ്യം അറിയിച്ച് ഗുജറാത്ത്, മധ്യപ്രദേശ് തുടങ്ങിയ സംസ്ഥാനങ്ങളിൽ നിന്നുള്ള കൂടുതൽ കർഷകർ ദില്ലിയുടെ അതിർത്തികളിലേക്കെത്തി.13 ദിവസമായി തുടരുന്ന കർഷക സമരങ്ങളുടെ പിന്നാലെയാണ് ഭാരത് ബന്ദ്. ആറാംഘട്ട ചർച്ചയെന്നുള്ള നിലയ്ക്ക് പ്രതിപക്ഷനേതാക്കൾ നാളെ വൈകീട്ട് രാഷ്ട്രപതിയെ കാണും.