ഫൈസര്‍ വാക്‌സിന്‍ പൊതുജനങ്ങള്‍ക്ക് വിതരണം തുടങ്ങി ; ആദ്യം സ്വീകരിച്ചത് 90 കാരി

പരീക്ഷണാടിസ്ഥാനത്തില്‍ അല്ലാതെ ഫൈസര്‍ കോവിഡ് 19 വാക്‌സിന്‍ ലഭിക്കുന്ന ലോകത്തെ ആദ്യത്തെ വ്യക്തിയായി തൊണ്ണൂറ് വയസുള്ള ബ്രിട്ടീഷുകാരി മാര്‍ഗരറ്റ് കീനന്‍. ബ്രിട്ടനില്‍ പൊതുജനങ്ങള്‍ക്ക് ചൊവ്വാഴ്ച വാക്‌സിന്‍ കുത്തിവയ്പ്പ് ആരംഭിച്ചു.

ചൊവ്വാഴ്ച രാവിലെ മധ്യ ഇംഗ്ലണ്ടിലെ കോവെന്‍ട്രിയിലെ പ്രാദേശിക ആശുപത്രിയില്‍ മാര്‍ഗരറ്റ് കീനന് വാക്‌സിന്‍ ലഭിച്ചു. അടുത്തയാഴ്ച മാര്‍ഗരറ്റിന് 91 വയസാകും.

ഫൈസറും ബയോ ടെക്കും വികസിപ്പിച്ചെടുത്ത കോവിഡ്19 വാക്‌സിന്‍ ചൊവ്വാഴ്ച ബ്രിട്ടന്‍ നല്‍കി തുടങ്ങി. പൊതുജനങ്ങള്‍ക്ക് പ്രതിരോധ കുത്തിവയ്പ്പ് ആരംഭിച്ച ആദ്യത്തെ പാശ്ചാത്യ രാജ്യമാണ് ബ്രിട്ടന്‍. കൊറോണ വൈറസിനെ പരാജയപ്പെടുത്തുന്നതില്‍ നിര്‍ണ്ണായകമായ നീക്കമായാണ് ഇത് കരുതപ്പെടുന്നത്.

'കോവിഡ് 19 നെതിരെ പ്രതിരോധ കുത്തിവയ്പ് ലഭിക്കുന്ന ആദ്യത്തെ വ്യക്തിയെന്ന നിലയില്‍ ഞാന്‍ വളരെ അഭിമാനിക്കുന്നു,' മാര്‍ഗരറ്റ് കീനന്‍ പറഞ്ഞു, ഒരു ഫോട്ടോഗ്രാഫറുടെയും ടി.വി ക്രൂവിന്റെയും മുന്നില്‍ വച്ച് ഫിലിപ്പൈന്‍സ് വംശജയായ ഒരു നഴ്‌സില്‍ നിന്ന് മാര്‍ഗരറ്റ് കീനന് കുത്തിവയ്പ് ലഭിച്ചു.