മണിലാല്‍ വധം; രാഷ്ട്രീയ കൊലപാതകമെന്ന് എ വിജയരാഘവന്‍

കൊല്ലം: മണ്‍റോത്തുരുത്തില്‍ സി.പി.എം. പ്രവര്‍ത്തകനും ഹോംസ്‌റ്റേ ഉടമയുമായ മണിലാലിന്റേത് രാഷ്ട്രീയ കൊലപാതകമാണെന്ന് ശക്തമായി വാദിച്ച് സിപിഎം സംസ്ഥാന സെക്രട്ടറി എ വിജയരാഘവന്‍ രംഗത്ത്. സംഭവത്തില്‍ രാഷ്ട്രീയ പങ്കില്ലെന്ന പൊലീസിന്റെ പ്രാഥമിക റിപ്പോര്‍ട്ടിനെതിരെയാണ് വിജയരാഘവന്‍ രംഗത്തെത്തിയിരിക്കുന്നത്. മണി ലാലിന്റേത് പാര്‍ട്ടി നേരത്തേ തന്നെ രാഷ്ട്രീയ കൊലപാതകമെന്ന് വ്യക്തമാക്കിയിട്ടുണ്ട്.
തെരഞ്ഞെടുപ്പ് സമയത്ത് പാര്‍ട്ടി ഓഫീസിന് മുന്നില്‍ സജീവ പ്രവര്‍ത്തകന്‍ കൊല്ലപ്പെട്ടാല്‍ രാഷ്ട്രീയ വൈരാഗ്യമെന്ന് വേറെ അന്വേഷിക്കേണ്ട കാര്യമില്ല. ബിജെപി ക്രിമിനല്‍ പശ്ചാത്തലമുള്ള ആളുകളെ തിരഞ്ഞുപിടിച്ച് പാര്‍ട്ടി അംഗത്വം നല്‍കുന്നു. പൊലീസ് വിശദമായ അന്വേഷണം നടത്തുമ്പോള്‍ കാര്യങ്ങള്‍ പുറത്തുവരുമെന്നും പ്രാഥമിക അന്വേഷണത്തിന്റെ മാത്രം അടിസ്ഥാനത്തില്‍ മാത്രമേ റിമാന്‍ഡ് റിപ്പോര്‍ട്ട് ഉണ്ടാകുവെന്നും അദ്ദേഹം പറഞ്ഞു.