കര്‍ഷകരെ തീവ്രവാദികളെന്ന് അധിക്ഷേപിച്ച ഫഡ്നവീസിനെതിരെ രൂക്ഷമായി വിമര്‍ശനവുമായി ഉദ്ദവ് താക്കറെ

മഹാരാഷ്ട്ര: കര്‍ഷകരെ തീവ്രവാദികള്‍ എന്ന് അധിക്ഷേപിച്ച ബിജെപി നേതാവും മഹാരാഷ്ട്ര മുന്‍ മുഖ്യമന്ത്രിയുമായ ദേവേന്ദ്ര ഫഡ്നവീസിനെതിരെ രൂക്ഷവിമര്‍ശനവുമായി മുഖ്യമന്ത്രി ഉദ്ദവ് താക്കറെ രംഗത്ത്. മഹാരാഷ്ട്രയില്‍ അപ്രഖ്യാപിത അടിയന്തരാവസ്ഥയാണെന്ന ഫഡ്നവീസിന്റെ ആരോപണത്തോട് പ്രതികരിക്കുകയായിരുന്നു അദ്ദേഹം.

'കേന്ദ്രത്തില്‍ കര്‍ഷകരെ തീവ്രവാദികളെന്ന് അധിക്ഷേപിക്കുന്നവരാണ് മഹാരാഷ്ട്രയില്‍ അടിയന്തരാവസ്ഥ എന്ന് പറഞ്ഞ് കുറ്റം പറയുന്നത്. കര്‍ഷകരെ തീവ്രവാദികള്‍ എന്ന് അധിക്ഷേപിക്കുന്നവര്‍ക്ക് മനുഷ്യനെന്ന് വിളിക്കപ്പെടാന്‍ പോലും അര്‍ഹതയില്ലെന്ന് ഉദ്ദവ് താക്കറെ ചൂണ്ടികാട്ടി. മഹാരാഷ്ട്രയില്‍ ബിജെപിക്കെതിരെ പോര് ശക്തമാക്കിയിരിക്കുകയാണ് ശിവസേന, സേനക്ക് മുഖ്യമന്ത്രി സ്ഥാനം കൊടുക്കാത്തതില്‍ പ്രതിഷേധിച്ചാണ് ഏറെകാലം നീണ്ട എന്‍ഡിഎ ബന്ധം കഴിഞ്ഞ തവണ സേന വിച്ഛേദിച്ചത്.
എന്നാല്‍ ഡല്‍ഹിയില്‍ കര്‍ഷകരുടെ സമരം കൊടുമ്പിരി കൊള്ളുകയാണ്, രണ്ടാം ഘട്ടത്തില്‍ ഡല്‍ഹിയിലേക്കുള്ള മുഴുവന്‍ പാതകളും ഉപരോധിക്കാനാണ് കര്‍ഷകരുടെ തീരുമാനം, ഒപ്പം നിരാഹാര സമരവും ടോള്‍ പ്ലാസകള്‍ ഉപരോധിക്കാനും തീരുമാനമുണ്ട്, രാജ്യവ്യാപകമായി ട്രെയിന്‍ തടയാനും കര്‍ഷകര്‍ക്ക് പദ്ധതിയുണ്ട്. കാര്‍ഷിക നിയമത്തിലെ ഭേദഗതികള്‍ മുഴുവനും റദ്ദ് ചെയ്യുന്നത് വരെ സമരം ചെയ്യാനാണ് കര്‍ഷകരുടെ തീരുമാനം.