തെരഞ്ഞെടുപ്പ് പരാജയം കണ്ണ് തുറപ്പിച്ചു; നേതൃമാറ്റം ആവശ്യപ്പെട്ട നേതാക്കളുമായി കൂടിക്കാഴ്ച നടത്താന്‍ സോണിയ ഗാന്ധി

ഡല്‍ഹി: ബീഹാര്‍ നിയമസഭാ തിരഞ്ഞെടുപ്പിലും രാജസ്ഥാന്‍, കേരളം എന്നിവിടങ്ങളിലെ തദ്ദേശ തിരഞ്ഞെടുപ്പിലും പൂര്‍ണ പരാജയം രുചിച്ചതിന് പിന്നാലെ കോണ്‍ഗ്രസില്‍ നേതൃമാറ്റം ആവശ്യപ്പെട്ട വിമതനേതാക്കളുമായി നേരിട്ട് സംസാരിക്കാന്‍ സോണിയ ഗാന്ധി.നാളെ സോണിയയുടെ ഡല്‍ഹിയിലെ വസതിയില്‍ വച്ച് കൂടിക്കാഴ്ച നടത്താനാണ് തീരുമാനം. കോണ്‍ഗ്രസില്‍ നേതൃമാറ്റം ആവശ്യപ്പെട്ട് കത്ത് നല്‍കിയ 23 നേതാക്കളാണ് സോണിയ ഗാന്ധിക്ക് കത്ത് അയച്ചത്. ഇവരുമായിട്ടാണ് സോണിയ ഗാന്ധി ചര്‍ച്ച നടത്തുക.

കഴിഞ്ഞ വാരം മധ്യപ്രദേശില്‍ നിന്നുള്ള കോണ്‍ഗ്രസ് നേതാവ് കമല്‍നാഥ് സോണിയ ഗാന്ധിയുമായി കൂടിക്കാഴ്ച നടത്തിയിരുന്നു. ഇതിലാണ് വിമതരുമായി ചര്‍ച്ച നടത്താന്‍ സോണിയ തയാറായത് എന്നാണ് റിപ്പോര്‍ട്ടുകള്‍. അതേസമയം രാഹുല്‍ ഗാന്ധിയുടെ അമ്മ എന്ന നിലയിലല്ല, കോണ്‍ഗ്രസ് അധ്യക്ഷ എന്ന നിലയില്‍ സോണിയ ഗാന്ധി സംസാരിക്കും എന്നാണ് പ്രതീക്ഷയെന്ന് വിമത നേതാക്കള്‍ പറഞ്ഞതായി ദി പ്രിന്റ് റിപ്പോര്‍ട്ട് ചെയ്തു. സോണിയ ഗാന്ധിയുടെ വലംകൈ ആയിരുന്ന അഹമ്മദ് പട്ടേലിന്റെ വിയോഗാനന്തരം നടക്കുന്ന കൂടിക്കാഴ്ചയാണ് ഇതെന്ന പ്രത്യേകത ഈ യോഗത്തിനുണ്ട്.

കോണ്‍ഗ്രസില്‍ നേതൃമാറ്റം ആവശ്യപ്പെട്ട് ഇക്കഴിഞ്ഞ ആഗസ്റ്റിലാണ് രാജ്യസഭ പ്രതിപക്ഷ നേതാവ് ഗുലാം നബി ആസാദ്, മുന്‍ കേന്ദ്രമന്ത്രിമാരായ കപില്‍ സിബല്‍, ആനന്ദ് ശര്‍മ, ശശി തരൂര്‍, എം. വീരപ്പ മൊയ്‌ലി, മനീഷ് തിവാരി, മിലിന്ദ് ദേവ്റ, രേണുക ചൗധരി, ജിതിന്‍ പ്രസാദ, മുകുള്‍ വാസ്നിക്, രാജ്യസഭ മുന്‍ ഉപാധ്യക്ഷന്‍ പി.ജെ.കുര്യന്‍ തുടങ്ങിയ നേതാക്കള്‍ സോണിയ ഗാന്ധിക്ക് കത്തെഴുതിയത്. കത്ത് മാധ്യമങ്ങള്‍ക്ക് കൈമാറിയതോടെ വലിയ വിവാദത്തിന് തുടക്കമായി. ഗാന്ധി കുടുംബത്തെ അനുകൂലിക്കുന്ന നേതാക്കളും നേതൃമാറ്റം ആവശ്യപ്പെട്ടവരും തമ്മില്‍ വാഗ്വാദം ചൂടുപിടിച്ചു.
തുടര്‍ന്ന് കോണ്‍ഗ്രസിന്റെ പാര്‍ലമെന്റിലെ കമ്മറ്റികള്‍ പുനഃസംഘടിപ്പിച്ച സോണിയ ഗാന്ധി നേതൃമാറ്റം ആവശ്യപ്പെട്ടവരെ ഒഴിവാക്കിയതും ശ്രദ്ധേയമായിരുന്നു.