ഇടതുപക്ഷത്തിന്റെ തെറ്റുകള്‍ മാത്രമല്ല, ബിജെപിയുടെ തെറ്റുകളും ഉയര്‍ത്തിക്കാണിച്ചേ മതിയാവൂ; മുരളീധരന്‍

ഇനിയുള്ള കാലത്ത് സിപിഐമ്മിന്റെ നയങ്ങള്‍ തുറന്നുകാണിക്കുന്നതിനോടോപ്പം ബിജെപിയുടെ തെറ്റുകളും ഉയര്‍ത്തിക്കാണിച്ചേ മതിയാവൂവെന്ന് കരുണാകരന്‍ ഓര്‍മ്മ ദിനത്തില്‍ മകനും എംപിയുമായ കെ മുരളീധരന്‍. കെ കരുണാകരന്റെ പത്താം ചരമവാര്‍ഷികദിനത്തില്‍ ഒരു ദിനപ്പത്രത്തില്‍ എഴുതിയ ലേഖനത്തിലായിരുന്നു മുരളീധരന്റെ ഈ പരാമര്‍ശം നടത്തിയത്. കേന്ദ്രാധികാരത്തിന്റെ ബലത്തില്‍ വളരുന്ന ബിജെപിയേയും, തെറ്റായ നയങ്ങള്‍ക്കിടയിലും ചില തന്ത്രങ്ങള്‍ കൊണ്ട് പിടിച്ചുനില്‍ക്കുന്ന സിപിഐഎമ്മിനേയും കോണ്‍ഗ്രസിന് നേരിടേണ്ടതുണ്ടെന്ന് മുരളീധരന്‍ പറഞ്ഞു. ഐക്യജനാധിപത്യമുന്നണിയുടെ കെട്ടുറപ്പിന് ക്ഷീണം സംഭവിച്ചു എന്നത് യാഥാര്‍ഥ്യമാണെന്ന് തുറന്നുപറഞ്ഞു. എന്നിരിക്കിലും മുന്നണി ദുര്‍ബലമായാതായി കാണേണ്ടതില്ലെന്നും മുന്നേറാനുള്ള വഴികള്‍ യുഡിഎഫിന് മുന്നില്‍ തുറന്നുകിടക്കുന്നുണ്ടെന്നും അദ്ദേഹം പറഞ്ഞു.ബിജെപിയും സിപിഎമ്മും ന്യൂനപക്ഷ, ഭൂരിപക്ഷ കാര്‍ഡുകള്‍ തരാതരം ഉപയോഗിച്ച് കളിക്കുകയാണെന്ന് മുരളീധരന്‍ ലേഖനത്തിലൂടെ കുറ്റപ്പെടുത്തി. ന്യൂനപക്ഷത്തെ സംരക്ഷിക്കുന്നതിനൊപ്പം ഭൂരിപക്ഷത്തിനും സംരക്ഷണമുണ്ട് എന്നതാണ് കരുണാകരന്‍ നല്‍കുന്ന പാഠമെന്ന് മുരളീധരന്‍ പറയുന്നു. മതഭക്തനായ കരുണാകരന്‍ സന്തുലിതാവസ്ഥ നിലനിര്‍ത്തിയെന്നും ഭക്തനായിരിക്കുന്നതിനോടൊപ്പം തന്നെ അദ്ദേഹം സെക്കുലറായിരുന്നുവെന്നും മുരളീധരന്‍ നിരീക്ഷിക്കുന്നു. കരുണാകരന്ശേഷം ഹിന്ദുവോട്ടുകള്‍ നഷ്ടമാകുന്നതായും മുരളീധരന്‍ വിലയിരുത്തി.