ഗവര്‍ണര്‍ സര്‍ക്കാര്‍ പോര് അയയുന്നു, പ്രത്യേക നിയമസഭാ സമ്മളനത്തിന് ഗവര്‍ണര്‍ അനുമതി നല്‍കിയേക്കും

ദിവസങ്ങളോളം നീണ്ടുനിന്ന ഗവര്‍ണര്‍- സര്‍ക്കാര്‍ പോര് അയയുന്നു. കാര്‍ഷിക നിയമ ഭേദഗതിക്കെതിരായ പ്രമേയം പാസാക്കുന്നതിന് പ്രത്യേക നിയമസഭാ സമ്മളനം വിളിച്ച് ചേര്‍ക്കുന്നതിന് ഗവര്‍ണര്‍ അനുമതി നല്‍കിയേക്കും. തന്നെ സന്ദര്‍ശിച്ച് സ്പീക്കര്‍ ശ്രീരാമകൃഷ്ണനോട് ഇതുസംബന്ധിച്ച സൂചന ഗവര്‍ണര്‍ ആരിഫ് മുഹമ്മദ് ഖാന്‍ നല്‍കിയതായാണ് വിവരം. നയപ്രഖ്യാപന പ്രസംഗത്തിന് ക്ഷണിക്കാന്‍ ആയിരുന്നു സ്പീക്കര്‍ രാജ്ഭവനിലെത്തിയത്. തിങ്കളാഴ്ച അനുമതി നല്‍കാന്‍ സാധ്യത. മുഖ്യമന്ത്രിയുടെ ഓഫീസ് കൂടുതല്‍ വിശദീകരണം നല്‍കിയതും മന്ത്രിമാരും സ്പീക്കറും നേരിട്ട് കണ്ടതും നിര്‍ണ്ണായകമായതായാണ് വിവരം. അങ്ങനെയെങ്കില്‍ ഈ മാസം 31 ന് സഭ ചേരും.
അതേ സമയം അനുമതി ചോദിച്ച രീതിയിലുള്ള അതൃപ്തി ഗവര്‍ണര്‍ സ്പീക്കറെ അറിയിച്ചതായാണ് വിവരം. മന്ത്രിമാരും സ്പീക്കറുമടക്കം വിശദീകരിച്ചതോടെ കര്‍ഷക പ്രശ്‌നത്തിന്റെ ഗൗരവം ഗവര്‍ണ്ണറെ ബോധ്യപ്പെടുത്താന്‍ കഴിഞ്ഞെന്നാണ് സര്‍ക്കാര്‍ വിലയിരുത്തല്‍. 31 ന് സഭ ചേരാന്‍ അനുമതി തേടി അയച്ച ഫയലിലും കാര്‍ഷിക നിയമഭേദഗതി കര്‍ഷകര്‍ക്കുണ്ടാക്കുന്ന ദോഷങ്ങളെ കുറിച്ച് വിശദീകരിച്ചിരുന്നു.