ഇത് അമേരിക്കയ്ക്ക് തന്നെ ആപത്ത് ; ഇംപീച്ച്മെന്റ് നടപടിക്കെതിരെ ട്രംപ്

തനിക്കെതിരായ ഇംപീച്ച്മെന്റ് നടപടിക്കെതിരെ ഡോണള്‍ഡ് ട്രംപ്. നിലവിലെ സംഭവ വികാസങ്ങള്‍ അമേരിക്കയ്ക്ക് ആപത്താണെന്ന് ട്രംപ് പറഞ്ഞു.
അസംബന്ധവും ഭയാനകവുമായ കാര്യമാണ് നടക്കുന്നത്. രാജ്യവ്യാപകമായി ജനരോക്ഷം ഉയരുകയാണെന്നും അക്രമം പാടില്ലെന്നും ട്രംപ് പറഞ്ഞു. കാപിറ്റോള്‍ ഹില്‍ കലാപത്തിന് ശേഷമുള്ള ട്രംപിന്റെ ആദ്യ പ്രതികരണമാണിത്.
യുഎസ് ജനപ്രതിനിധി സഭയില്‍ ട്രംപിനെതിരെ കഴിഞ്ഞ ദിവസം ഇംപീച്ച്മെന്റ് പ്രമേയം അവതരിപ്പിച്ചിരുന്നു. ബുധനാഴ്ചയോടെ വോട്ടെടുപ്പ് നടത്താനാണ് ആലോചിക്കുന്നത്. കാപിറ്റോള്‍ ഹില്ലില്‍ കലാപത്തിന് ട്രംപ് പ്രേരിപ്പിച്ചെന്ന് പ്രമേയത്തില്‍ ചൂണ്ടിക്കാട്ടിയിരുന്നു.അതേസമയം അമേരിക്കയുടെ പുതിയ പ്രസിഡന്റായി ജോ ബൈഡന്‍ സ്ഥാനമേല്‍ക്കുന്ന ജനുവരി 20ന് വാഷിംഗ്ടണില്‍ അടിയന്തരാവസ്ഥ പ്രഖ്യാപിച്ചു. അനിഷ്ട സംഭവങ്ങള്‍ ഒഴിവാക്കാനാണ് നീക്കം. ഈ ദിനത്തില്‍ രാജ്യത്തെ ഫെഡറല്‍ ഏജന്‍സികള്‍ക്ക് പ്രത്യേക സുരക്ഷാ നിര്‍ദേശങ്ങളും പുതിയ ഉത്തരവിലുണ്ട്.