ജിയോ മാര്‍ട്ട് ഇനി വാട്സ്ആപ്പില്‍

മുംബൈ: ജിയോ മാര്‍ട്ടിനെ വാട്‌സ്ആപ്പുമായി ബന്ധിപ്പിക്കുന്നു. 40 കോടി പേര്‍ ഉപയോഗിക്കുന്ന രാജ്യത്തെ ഏറ്റവും ജനകീയമായ മെസേജിങ് ആപ്പ് വഴി ഗ്രാമങ്ങളില്‍പോലും അതിവേഗം സാന്നിധ്യമുറപ്പാക്കുകയാണ് റിലയന്‍സിന്റെ ലക്ഷ്യം. ഓണ്‍ലൈന്‍ റീട്ടെയ്ല്‍ മേഖലയില്‍ ഫ്‌ളിപ്കാര്‍ട്ടിനും ആമസോണിനും ഇത് കനത്ത വെല്ലുവിളിയാകും. 2025ഓടെ 1.3 ലക്ഷം കോടി ഡോളര്‍ മൂല്യമുണ്ടാകുമെന്ന് പ്രതീക്ഷിക്കുന്ന ഓണ്‍ലൈന്‍ റീട്ടെയ്ല്‍ മേഖല പിടിച്ചെടുക്കാനാണ് അംബാനിയുടെ ശ്രമം. നിലവില്‍ രാജ്യത്തെ ഏറ്റവും വലിയ ഓഫ്ലൈന്‍ റീട്ടെയ്ലറായി റിലയന്‍സ് മാറിക്കഴിഞ്ഞു. വാട്‌സ്ആപ്പുമായി കരാറിലെത്തി ഒരുമാസത്തിനകം ആദ്യഘട്ടത്തില്‍ 200 നഗരങ്ങളില്‍ ജിയോമാര്‍ട്ട് പ്രവര്‍ത്തനംതുടങ്ങി. റിലയന്‍സ് ഇന്‍ഡസ്ട്രീസിന്റെതന്നെ ഡിജിറ്റല്‍ യൂണിറ്റായ ജിയോ പ്ലാറ്റ്‌ഫോമില്‍ 5.7 ബില്യണ്‍ ഡോളര്‍ നിക്ഷേപിച്ചതിനു പിന്നാലെയായിരുന്നു ഇത്.