ആരാധകരെ ആവേശത്തിലാക്കി ടൊവിനോയുടെ ‘കള’ ടീസര്‍ ; ഒടുക്കത്തെ ത്രില്ലെന്ന് ആരാധകര്‍

ടൊവിനോയെ നായകനാക്കി രോഹിത് വി എസ് സംവിധാനം ചെയ്ത സിനിമയാണ് 'കള'. ചിത്രത്തെ കുറിച്ച് പുറത്ത് വരുന്ന ഓരോ വാര്‍ത്തകളും ആരാധകര്‍ ഇരുകയ്യും നീട്ടി ആയിരുന്നു സ്വീകരിച്ചിരുന്നത്. ഇപ്പോഴിതാ ആരാധകരുടെ കാത്തിരിപ്പിന് ചെറിയൊരു ആശ്വാസം നല്‍കി കൊണ്ട് 'കള'യുടെ ടീസര്‍ പുറത്തിറങ്ങിയിരിക്കുകയാണ്.
അഡ്വഞ്ചേഴ്സ് ഓഫ് ഓമനക്കുട്ടന്‍, ഇബിലീസ് എന്നീ സിനിമകള്‍ക്ക് ശേഷം രോഹിത് സംവിധാനം ചെയ്യുന്ന സിനിമയാണ് കള. യദു പുഷ്പാകരനും രോഹിത് വിഎസും ചേര്‍ന്നാണ് ചിത്രത്തിന്റെ രചന നിര്‍വ്വഹിക്കുന്നത്. ചിത്രത്തില്‍ ലാലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. കളയുടെ ചിത്രീകരണത്തിനിടെയായിരുന്നു ടൊവിനോ തോമസിന് പരുക്കേറ്റത്.
പുറത്തിറങ്ങി നിമിഷങ്ങള്‍ക്കുള്ളില്‍ മികച്ച പ്രതികരണമാണ് ടീസറിന് ലഭിച്ചു കൊണ്ടിരിക്കുന്നത്. 'ലൊക്കേഷന്‍ സ്റ്റില്‍സ്, മോഷന്‍ പോസ്റ്റര്‍, ദേ ഇപ്പോള്‍ ടീസര്‍… നല്‍കുന്ന പ്രതീക്ഷ രോഹിത്ത് അണിയറയില്‍ ഒരുക്കിവച്ചിരികുന്നത് ചെറുതൊന്നുമല്ല….ഇത് തീ പാറും' എന്നാണ് ഒരു ആരാധകന്റെ കമന്റ്. തിയറ്ററില്‍ വരുന്നതിനായി കാത്തിരിക്കുന്നുവെന്ന് പറയുന്നവരും ഇക്കൂട്ടത്തിലുണ്ട്.
ഛായാഗ്രഹണം അഖില്‍ ജോര്‍ജ്. എഡിറ്റിംഗ് ലിവിങ്സ്റ്റണ്‍ മാത്യു. ശബ്ദ സംവിധാനം ഡോണ്‍ വിന്‍സെന്റ്. അസോസിയേറ്റ് ഡയറക്ടേഴ്‌സ് ബാസിദ് അല്‍ ഗസാലി, സജൊ. പബ്ലിസിറ്റി പവിശങ്കര്‍. അഡ്വഞ്ചര്‍ കമ്പനിയുടെ ബാനറില്‍ സിജു മാത്യു, നാവിസ് സേവ്യര്‍ എന്നിവരാണ് നിര്‍മ്മാണം. ടൊവിനോയും രോഹിത്തും അഖില്‍ ജോര്‍ജും സഹനിര്‍മ്മാതാക്കളാണ്.