പണിക്കുപോകാതെ ആഢംബര ജീവിതം നയിച്ച മരുമകന് അമ്മായിയമ്മയുടെ ക്വട്ടേഷന്‍

പണിക്കുപോകാതെ ആഢംബര ജീവിതം നയിച്ച മരുമകന് ക്വട്ടേഷന്‍ കൊടുത്ത് അമ്മായിയമ്മ. കൊല്ലത്താണ് സംഭവം. കേരളപുരം സ്വദേശിനി നജിയാണ് ക്വട്ടേഷന്‍ കൊടുത്തത്. മാലപൊട്ടിക്കാന്‍ ശ്രമിച്ച സംഘം പൊലീസിന്റെ പിടിയിലായതോടെയാണ് ക്വട്ടേഷന്‍ വിവരം പുറംലോകമറിയുന്നത്. മകള്‍ക്കും രണ്ടാം ഭര്‍ത്താവിനും വര്‍ഷങ്ങളായി ചിലവിന് നല്‍കിയിരുന്നത് 48കാരിയായ നജിയായിരുന്നു. മരുമകനോട് ജോലിക്ക് പോകാന്‍ ആവശ്യപ്പെട്ടെങ്കിലും വഴങ്ങിയില്ല. ഇത് കൂടാതെ ആഢംബര ജീവിതം നയിക്കുകയും ചെയ്തു. ഇതോടെയാണ് നജി ക്വട്ടേഷന്‍ കൊടുത്തത്. കഴിഞ്ഞ മാസം ഏഴുകോണില്‍ വച്ച് നജിയുടെ മകളും മരുമകനും ആക്രമിക്കപ്പെട്ടു. മകളുടെ മാല പൊട്ടിച്ച് സംഘം കടന്നു. ദിവസങ്ങള്‍ക്കുള്ളില്‍ ഇവര്‍ പൊലീസ് പിടിയിലായി. വിശദമായ ചോദ്യം ചെയ്യലില്‍ നജിയുടെ ക്വട്ടേഷനാണെന്ന് വെളിപ്പെടുത്തി. പൊലീസ് കേസെടുത്തതോടെ നജി ഒളിവില്‍ പോയി. സൈബര്‍ സെല്ലിന്റെ സഹായത്തോടെ ഇവരെ പിന്നീട് പൊലീസ് അറസ്റ്റ് ചെയ്യുകയായിരുന്നു.